ڈاکٹر سہیل طارق نے فیصل مسعود ٹیچنگ ہسپتال سرگودھا کے میڈیکل سپرنٹنڈنٹ کی حیثیت سے چارج سنبھال لیا

پیر 26 مئی 2025 19:23

سرگودھا (اُردو پوائنٹ اخبارتازہ ترین - اے پی پی۔ 26 مئی2025ء) ڈاکٹر سہیل طارق نے فیصل مسعود ٹیچنگ ہسپتال سرگودھا کے میڈیکل سپرنٹنڈنٹ کی حیثیت سے چارج سنبھال لیا ۔ چارج سنبھالتے ہی انہوں نے ہسپتال کے نظام کو بہتر بنانے کے لیے عملی اقدامات شروع کر دیئےہیں۔ڈاکٹر سہیل طارق نے ڈاکٹرز، پیرا میڈیکل سٹاف اور نرسنگ سٹاف کو ہدایت کی ہے کہ وہ مریضوں کے ساتھ خوش اخلاقی اور شفقت سے پیش آئیں۔

ان کا کہنا تھا کہ مریض پہلے ہی ذہنی و جسمانی اذیت میں مبتلا ہوتا ہے، اگر طبی عملہ حسن اخلاق سے پیش آئے تو مریض کی آدھی بیماری ختم ہو سکتی ہے۔انہوں نے ہسپتال میں تعینات سیکیورٹی گارڈز کو بھی ہدایت کی ہے کہ وہ مریضوں اور ان کے لواحقین کے ساتھ خوش اخلاقی سے پیش آئیں تاکہ ہسپتال کا ماحول بہترین بنایا جا سکے۔

(جاری ہے)

نئے ایم ایس نے ہسپتال میں صفائی کے نظام کو بہتر بنانے، ادویات کی دستیابی یقینی بنانے اور وارڈز میں بنیادی سہولیات کی فراہمی کے لیے بھی واضح احکامات جاری کیے ہیں۔

انہوں نے کہا کہ ہسپتال میں مریضوں کے لیے پینے کے صاف پانی، مناسب روشنی، صاف واش رومز اور بیٹھنے کے بہتر انتظامات کو ترجیحی بنیادوں پر بہتر بنایا جائے گا۔ ڈاکٹر سہیل طارق نے کہا کہ اگر کسی مریض یا اس کے لواحقین کو کسی بھی قسم کی پریشانی یا شکایت ہو تو وہ بلا جھجک اور بغیر کسی سفارش کے براہِ راست مجھ سے رابطہ کر سکتے ہیں۔ انہوں نے ہسپتال میں جدید طرز پر شکایات درج کرانے کا نظام متعارف کرانے اور مریضوں کے فیڈبیک کی روشنی میں سروسز کو مزید بہتر بنانے کے عزم کا بھی اظہار کیا۔ ان کا کہنا ہے کہ ہسپتال کو ایک مثالی ادارہ بنانے کے لیے وہ تمام تر صلاحیتیں بروئے کار لائیں گے۔