Live Updates

عید قربان کی آمد،نیاموآنہ مویشی منڈی سمیت دیگر سیل پوائنٹس پر جانوروں کی آمد سے رونقیں دوبالا

منگل 27 مئی 2025 12:00

مکوآنہ (اُردو پوائنٹ اخبارتازہ ترین - این این آئی۔ 27 مئی2025ء)عید قربان کی آمد کے موقع پرفیصل آبادکی نیاموآنہ مویشی منڈی سمیت دیگر سیل پوائنٹ پر جانوروں کی آمد سے رونقیں دوبالا ہو گئیں، تاہم مہنگے جانوروں کی وجہ سے خریداری کم جبکہ قربانی کے جانوروں کو دیکھنے والوں کا رش لگناشروع ہو گیا ہے۔ تفصیل کے مطابق عید قربان کی آمد کے سلسلہ میں شہر کی نیاموآنہ مویشی منڈی اور اس کے باہر سمیت شہر کے دیگر مقامات پر عارضی مویشی منڈیاں جھنگ روڈ،ستیانہ روڈ پر خانوآنہ کے قریب قربانی کے جانوروں کی آمد کا سلسلہ شروع ہو گیا۔

قربانی کے جانوروں کی آمد کے ساتھ ہی مویشی منڈیوں کی رونقیں دوبالا ہو گئیں تاہم مہنگائی کے باعث بیوپاری قربانی کے جانوروں کے منہ مانگے دام مانگنے لگے جس کی * وجہ سے خریداری بہت کم جبکہ قربانی کے جانور دیکھنے والوں کا رش بڑھ گیا۔

(جاری ہے)

لوگوں کی بڑی تعداد قربانی کے جانور دیکھنے کیلئے مویشی منڈیوں کا رُخ کرنے لگی۔شہری اپنے دوست احباب اور والدین اپنے بچوں کے ہمراہ قربانی کے جانور دیکھنے کیلئے مویشی منڈی پہنچ گئے۔

وزنی اور خوبصورت جانوروں کی آمد سے مویشی منڈیوں کی رونقیں بحال ہونے لگی۔ ضلعی انتظامیہ کی طرف سے مویشی منڈیوں کے علاوہ شہر بھر کے اکثر علاقوں میں قربانی کے جانوروں کی خرید وفروخت پر پابندی عائد کی گئی ہے لیکن پھر بھی شہر بھر میں اہم چوراہوں،شاہراہوں پر بیوپاریوں کی بڑی تعدادبکروں،چھتروں کے ساتھ ساتھ بڑے جانوروں کی خریدوفروخت کیلئے پہنچ گئے۔ مویشی منڈیوں اور قربانی کے جانوروں کے سیل پوائنٹس پر سکیورٹی کیلئے بھی اقدامات کئے جارہے ہیں۔