ریجنل ڈرامہ فیسٹیول 2025 کا تیسرا روز، معروف فنکاروں نے شاندار پرفارمنس پیش کی

منگل 27 مئی 2025 23:05

راولپنڈی (اُردو پوائنٹ اخبارتازہ ترین - اے پی پی۔ 27 مئی2025ء) پنجاب کونسل آف دی آرٹس راولپنڈی کے زیر اہتمام جاری ریجنل ڈرامہ فیسٹیول 2025 کے تیسرے روز معروف فنکاروں نے شاندار سٹیج پرفارمنس پیش کی۔ یہ فیسٹیول وزیر اطلاعات و ثقافت پنجاب عظمیٰ بخاری کی خصوصی ہدایت پر پنجاب میں فیملی تھیٹر کی بحالی کے لیے منعقد کیا جا رہاہے۔تیسرے روز پیش کیا جانے والا سٹیج ڈرامہ ’’میں ایک فنکار ہوں ‘‘ نے ناظرین کے دل جیت لیے۔

اس ڈرامے کو معروف اداکار اور مصنف سعید انور نے تحریر کیا جبکہ مرکزی کرداروں میں سعید انور، ہمایوں، سورج خان، عباس ننھا اور ماہی نے اپنی بے مثال اداکاری کے جوہر دکھائے۔ڈرامے کی کہانی ایک فنکار کی زندگی کے نشیب و فراز، جذبات اور سماجی پہلوؤں پر مبنی تھی، جسے حاضرین نے خوب سراہا۔

(جاری ہے)

فنکاروں کی پرفارمنس نے فیملی تفریح کے معیار کو نئی بلندیوں پر پہنچایا اور حاضرین نے سٹیج پر واپسی کرتے تھیٹر کو ایک خوش آئند اقدام قرار دیا۔

فیسٹیول کے انعقاد کا مقصد مقامی فنکاروں کو پلیٹ فارم فراہم کرنا اور فیملی تفریح کو فروغ دینا ہے۔ پنجاب کونسل آف دی آرٹس راولپنڈی کی یہ کاوش پنجاب کی ثقافتی ترقی میں ایک اہم قدم ہے۔فیسٹیول کی تقریبات جاری ہیں اور عوام سے شرکت کی اپیل کی جاتی ہے تاکہ تھیٹر اور فنون لطیفہ کو فروغ حاصل ہو۔