ا*توانائی منصوبوں کی بروقت تکمیل اولین ترجیح ہے،انجینئرطارق سدوزئی

جمعرات 29 مئی 2025 22:00

ُپشاور (اُردو پوائنٹ اخبارتازہ ترین - آن لائن۔ 29 مئی2025ء)وزیراعلی خیبرپختونخوا کے معاون خصوصی برائے توانائی انجینئر طارق سدوزئی نے کہا ہے کہ صوبے میں جاری توانائی منصوبوں کی بروقت تکمیل صوبائی حکومت کی اولین ترجیح ہے جس کے لئے حکومت بروقت فنڈز کی فراہمی کے ساتھ ساتھ تمام وسائل بروئے کارلارہی ہے۔ توانائی کے منصوبوں کی تکمیل سے آنے والے دنوں میں معاشی ترقی کے ساتھ ساتھ روزگارکے نئے مواقع پیداہونگے اورصوبے میںصنعتی ترقی کے دورکا آغاز ہوگا۔

ان خیالات کا اظہارانہوںنے بحرین سوات میں 36میگاواٹ درال خوڑ پن بجلی گھر اورسوات میں84میگاواٹ گورکن مٹلتان پن بجلی کے جاری منصوبے کے سائٹ دورہ کے موقع پر کیا۔ اس موقع پر ریزیڈنٹ انجینئر سمیت دیگر متعلقہ حکام بھی موجود تھے۔

(جاری ہے)

وزیر اعلیٰ کے معاون خصوصی کو متعلقہ افسران نے درال خوڑ پن بجلی گھر سے توانائی کی پیداوار اور حاصل آمدنی،اہم کامیابیوں، 2022 کے سیلاب سے ہونے والے نقصانات اور اب تک کی بحالی کی کوششوں، موجودہ اور مستقبل کی منصوبہ بندی، عملے کی کمی سمیت دیگر درپیش چیلنجز کے حوالے سے تفصیلی بریفنگ دی، اس موقع پر معاون خصوصی نے درال خوڑ پن بجلی گھر میں کام کرنے والی ٹیم کی مجموعی کوششوں کو سراہا اور درپیش چیلنجز کو حل کرنے کے لئے ہر ممکن اقدامات اٹھانے کا یقین دلایا، انھوں نے بجلی گھر سے توانائی کی بلا تعطل ترسیل کو یقینی بنانے کے لئے ہدایات جاری کیں اورکمپلیکس میں اسپیئر پارٹس کا مناسب ذخیرہ کی موجودگی پرزوردیاتاکہ اسپیئر پارٹس کی عدم دستیابی کی وجہ سے توانائی کی پیداوار اور آمدنی پر کوئی اثر نہ پڑے۔

دریں اثناء انجینئر طارق سدوزئی نے 84 میگاواٹ گورکن مٹلتان پن بجلی منصوبے کے سائٹ کا دورہ بھی کیا۔ اس موقع پر منصوبے کے پراجیکٹ ڈائریکٹر نے پن بجلی منصوبے پر جاری کام کے حوالے سے معاون خصوصی کو تفصیلی بریفنگ دی، طارق سدوزئی نے منصوبے پر جاری کام پر اطمینان کا اظہار کرتے ہوئے انہیں مقررہ مدت جون 2026 کی کمرشل آپریشن ڈیٹ کو پورا کرنے کی اہمیت پر زور دیا، انہوں نے متعلقہ حکام کو منصوبے پر کام مزید تیز کرنے کی ہدایت کی اور انھیں منصوبے میں درپیش مشکلا ت کو حل کرنے کے لیے ہر ممکن تعاون کا یقین دلایا۔

معاون خصوصی انجنئیر طارق سدوزئی کو 132/220 کے وی ٹرانسمیشن لائن کی تعمیر کے بارے میں بھی بریفنگ دی گئی معاون خصوصی کو بتایا گیا کہ ٹاور کے مقامات کے لیے رائٹ آف وے کلیئرنس میں مقامی انتظامیہ کے ساتھ مسلسل رابطے قائم ہیں، جس کی وجہ سے مختلف ٹاور مقامات پر کام جاری ہے۔اس موقع پر معاون خصوصی نے پراجیکٹ کی بروقت تکمیل یقینی بنانے کے لیے اپنی مکمل حمایت کا یقین دلایا۔