پریذیڈنٹ ٹرافی گریڈ ٹو کے فائنل میں ساحر ایسوسی ایٹس کے باؤلرز کی شاندار کارکردگی

ایم آئی ٹی سلیوشنز کی ٹیم کو پہلی اننگز میں محض 135 رنز پر آؤٹ کر دیا

ہفتہ 31 مئی 2025 11:50

راولپنڈی(اُردو پوائنٹ اخبارتازہ ترین - این این آئی۔ 31 مئی2025ء)پریذیڈنٹ ٹرافی گریڈ ٹو کے فائنل میں ساحر ایسوسی ایٹس کے باؤلرز نے شاندار کارکردگی کا مظاہرہ کرتے ہوئے ایم آئی ٹی سلیوشنز کی ٹیم کو پہلی اننگز میں محض 135 رنز پر آؤٹ کر دیا۔ ایم آئی ٹی سلیوشنز نے گزشتہ روز کے اسکور 46 رنز ایک کھلاڑی آؤٹ پر اننگز کا آغاز کیا لیکن پوری ٹیم صرف 89 رنز کا اضافہ ہی کر سکی۔

ایم آئی ٹی سلیوشنز کی جانب سے محمد طیب 36 رنز کے ساتھ ناٹ آؤٹ رہتے ہوئے ٹاپ اسکورر رہے۔

(جاری ہے)

ساحر ایسوسی ایٹس کی طرف سے شاہد علی نے تباہ کن باؤلنگ کرتے ہوئے 4 وکٹیں حاصل کیں جبکہ محسن خان، خان زیب اور محمد بلاول نے دو، دو کھلاڑیوں کو آؤٹ کیا۔ ساحر ایسوسی ایٹس کو پہلی اننگز میں 137 رنز کی واضح برتری حاصل ہو گئی ہے۔ ساحر ایسوسی ایٹس نے دوسرے دن کھیل کے اختتام پر اپنی دوسری اننگز میں بغیر کسی نقصان کے 52 رنز بنا لیے جس کے بعد ان کی مجموعی برتری 189 رنز تک پہنچ گئی ہے۔ فہد عثمان 36 اور خواجہ عبداللہ 14 رنز کے ساتھ وکٹ پر موجود ہیں۔یاد رہے کہ یہ فیصلہ کن معرکہ جیتنے والی ٹیم آئندہ سیزن میں پریذیڈنٹ ٹرافی گریڈ ون ٹورنامنٹ میں شرکت کی اہل ہو جائے گی۔