سائوتھ سٹی ایجوکیشن ہب اور جناح سندھ میڈیکل یونیورسٹی کے اشتراک سے دوسرا کانووکیشن

کراچی(اُردو پوائنٹ اخبارتازہ ترین - این این آئی۔ 31 مئی2025ء)سائوتھ سٹی ایجوکیشن ہب، جو کہ جناح سندھ میڈیکل یونیورسٹی (JSMU) سے منسلک ادارہ ہے، کا دوسرا کانووکیشن بڑی خوش اسلوبی اور جوش و خروش کے ساتھ 31 مئی 2025 کو منعقد ہوا۔ اس باوقار تقریب میں ڈاکٹر آف فزیکل تھیراپی اور بیچلر آف نرسنگ کے گریجویٹس کو اسناد عطا کی گئیں۔تقریب کی صدارت پروفیسر ڈاکٹر امجد سراج میمن، وائس چانسلر JSMU نے کی، جب کہ ڈاکٹر سعدیہ رسول ورک، چیئرپرسن ساتھ سٹی ایجوکیشن ہب نے سب کا پرتپاک استقبال کیا۔

اس موقع پر پروفیسر ڈاکٹر طارق رفیع، چیئرمین سندھ ہائر ایجوکیشن کمیشن، بطور مہمانِ خصوصی شریک ہوئے۔ انہوں نے فارغ التحصیل طلبہ کو مخاطب کرتے ہوئے کہاکہ"آپ صرف پیشے کا حصہ نہیں بن رہے، بلکہ ایک ایسی خدمت کا آغاز کر رہے ہیں جو انسانی زندگیوں کو بہتر بنانے میں اہم کردار ادا کرے گی۔

(جاری ہے)

آپ ہمارے معاشرے کی امید ہیں۔"اس موقع پر پروفیسر ڈاکٹر امجد سراج میمن نے خطاب کرتے ہوئے کہاکہ"یہ کانووکیشن اختتام نہیں، ایک نیا آغاز ہے۔

ہمیں اپنے فارغ التحصیل طلبہ سے یہی توقع ہے کہ وہ علم، ہمدردی، اور اعلی پیشہ ورانہ اقدار کے ساتھ معاشرے کی خدمت کریں گے۔"ڈاکٹر سعدیہ رسول ورک، چیئرپرسن ساتھ سٹی ایجوکیشن ہب، نے مہمانِ خصوصی اور وائس چانسلر JSMU کا خیرمقدم کرتے ہوئے کہاکہ"ہمارا عزم ہے کہ ہم اپنے طلبہ کو نہ صرف معیاری تعلیم دیں بلکہ انہیں ایک ایسا ماحول فراہم کریں جہاں وہ بطور باوقار اور باصلاحیت پروفیشنلز ابھر سکیں۔

ڈاکٹر اعظم خان، رجسٹرار JSMU نے طلبہ کو اپنے شعبوں میں دیانتداری اور اخلاقی اصولوں کی پاسداری کا پابند بنایا۔ڈاکٹر محمد خان، چیئرمین انسٹی ٹیوٹ آف فزیکل تھیراپی اینڈ ریہیبلیٹیشن (IPTR-JSMU)، اور ڈاکٹر روبینہ حفیظ ، پرنسپل انسٹی ٹیوٹ آف نرسنگ جے ایس ایم یو، نے فخر کے ساتھ گریجویٹس کو اسناد کے لیے پیش کیا اور ان سے پروفیشنل حلف لیا۔ اسٹیج پر موجود ڈاکٹر فوزیہ امتیاز، کنٹرولر امتحانات JSMU، نے اسناد کی تقسیم کا مشاہدہ کیا اور طلبہ کی کامیابی کو سراہا۔

محترمہ غزالہ نور نظامی، ایڈیشنل ڈائریکٹر IPTR-JSMU، نے بھی اس تقریب میں بھرپور شرکت کی اور طلبہ کو دل کی گہرائیوں سے مبارکباد دی۔یہ تقریب خوشی، فخر، اور عزم کے جذبے کے ساتھ اختتام پذیر ہوئی، جہاں نئے فارغ التحصیل طلبہ نے اپنے پیشہ ورانہ سفر کا باقاعدہ آغاز کیا۔