گلیات میں ماحولیاتی خلاف ورزیوں پر ہوٹلز سیل، متعدد کو نوٹس جاری

اتوار 1 جون 2025 19:20

ایبٹ آباد (اُردو پوائنٹ اخبارتازہ ترین - اے پی پی۔ 01 جون2025ء) وزیر اعلیٰ خیبر پختونخوا کے مشیر برائے سیاحت زاہد چن زیب کی ہدایت پرچیف سیکرٹری خیبر پختونخوا شہاب علی اور ڈائریکٹر جنرل گلیات ڈیویلپمنٹ اتھارٹی شاہ رخ علی کی نگرانی میں اعلیٰ سطحی معائنہ ٹیم نے ایوبیہ، خانسپور اور چھانگلہ گلی کے علاقوں میں ہوٹلز کا دورہ کیا۔

(جاری ہے)

معائنہ جی ڈی اے کے ڈائریکٹر ٹیکنیکل انجینئر ارسلان شوکت کی قیادت میں کیا گیا، جس کا مقصد ہوٹلوں میں سیوریج سسٹمز اور پانی کی ٹینکیوں کی صفائی کے انتظامات کا جائزہ لینا تھا۔

معائنہ کے دوران ماحولیاتی اصولوں کی سنگین خلاف ورزی پر کئی ہوٹلز کو موقع پر ہی سیل کر دیا گیا جبکہ معمولی کوتاہی پر متعدد ہوٹلز کو فوری اصلاح کے لیے نوٹس جاری کیے گئے۔ ڈائریکٹر ٹیکنیکل انجنئیر ارسلان شوکت نے واضح کیا کہ آئندہ سیاحتی سیزن میں خلاف ورزی کرنے والے ہوٹلوں کے خلاف سخت کارروائی جاری رہے گی۔علاقہ مکینوں اور سیاحوں نے اس اقدام کو سراہتے ہوئے کہا کہ یہ ماحولیاتی تحفظ اور عوامی صحت کے لیے ایک مثبت قدم ہے۔