Live Updates

پاکستان: سکول تشدد میں بارہ سالہ طالبعلم کی ہلاکت قابل مذمت، یونیسف

یو این پیر 2 جون 2025 02:45

اسلام آباد (اُردو پوائنٹ ۔ UN اردو۔ 02 جون 2025ء) اقوام متحدہ کے ادارہ برائے اطفال (یونیسف) نے پاکستان میں سکول کے بچے کی جسمانی سزا کے نتیجے میں ہلاکت کی مذمت کرتے ہوئے کہا ہے کہ بچوں کے خلاف تشدد ناقابل قبول ہے جس کی روک تھام کو یقینی بنایا جانا چاہیے۔

یونیسف نے واضح کیا ہے کہ سکولوں کو بچوں کے لیے محفوظ اور سیکھنے کی جگہیں ہونا چاہیے جہاں وہ پرورش پائیں اور تحفظ سے رہیں۔

اس واقعے سے پاکستان میں طلبہ اور والدین کا تعلیمی اداروں پر اعتماد مجروح ہوا ہے۔

ادارے نے غمزدہ خاندان، متوفی کے ساتھی طلبہ اور اس المناک واقعے سے متاثرہ تمام لوگوں سے تعزیت کا اظہار کیا ہے۔

(جاری ہے)

اطلاعات کے مطابق، یہ واقعہ صوبہ خیبرپختونخوا کے شہر جمرود میں پیش آیا جہاں ایک سکول میں صبح کی اسمبلی کے دوران 12 سالہ بچے کو اس کے استاد نے شدید تشدد کا نشانہ بنایا جس سے وہ جانبر نہ ہو سکا۔

محفوظ ماحول میں تعلیم کا حق

یونیسف نے کہا ہے کہ ایسی سزا سے بچوں کو ناصرف جسمانی نقصان ہوتا ہے بلکہ اس سے ان پر طویل مدتی منفی نفسیاتی اثرات بھی مرتب ہوتے ہیں جو اس کی ترقی اور بہبود کو متاثر کرنے کے علاوہ سیکھنے، آگے بڑھنے اور اپنی مکمل صلاحیتوں سے کام لینے کی راہ میں بھی رکاوٹ بنتے ہیں۔

سکولوں میں جسمانی سزا دینے کی ممانعت کے قوانین پر سختی سے عملدرآمد ہونا چاہیے۔ اس سلسلے میں اساتذہ کو نظم و ضبط قائم کرنے کے لیے مثبت اور غیرمتشدد طریقوں سے کام لینے کی تربیت بھی دی جانی چاہیے۔

ادارے نے بچوں کے حقوق پر اقوام متحدہ کے کنونشن کے تحت ایسے رسوم ورواج اور رویوں کو تبدیل کرنے پر بھی زور دیا ہے جو جسمانی سزا کے رجحان کو تقویت دیتے ہیں جبکہ پاکستان نے بھی اس کنونشن پر دستخط کر رکھے ہیں۔

ادارے نے واضح کیا ہے کہ تمام بچوں کو محفوظ ماحول میں تعلیم حاصل کرنے کا حق ہے۔ انہیں تشدد کا نشانہ نہیں بنانا چاہیے اور ہر طرح کے حالات میں ہر بچے کے حقوق کو برقرار رکھنا لازم ہے۔