اے این ایف کا کریک ڈاؤن؛ قطراوربرطانیہ بھیجے جانے والے پارسلزسے منشیات برآمد

مختلف کارروائیوں میں 7 ملزمان کو گرفتار کرکے ایک کروڑ 63 لاکھ سے زائد مالیت کی منشیات برآمد کی گئی

پیر 2 جون 2025 14:40

اے این ایف کا کریک ڈاؤن؛ قطراوربرطانیہ بھیجے جانے والے پارسلزسے منشیات ..

اسلام آباد،راولپنڈی،کراچی(اُردو پوائنٹ اخبارتازہ ترین - این این آئی۔ 02 جون2025ء)اے این ایف کے مختلف آپریشنز میں قطر اور برطانیہ بھیجے جانے والے پارسلز سے منشیات برآمد کرلی گئی۔ ترجمان کے مطابق اینٹی نارکوٹکس فورس نے ملک کے مختلف شہروں میں منشیات اسمگلنگ کے خلاف مؤثر کریک ڈاؤن کرتے ہوئے 8 کامیاب کارروائیوں میں مجموعی طور پر 7 ملزمان کو گرفتار کر لیا۔

ان کارروائیوں کے دوران مجموعی طور پر 198.711 کلوگرام منشیات برآمد کی گئیں جن کی مالیت ایک کروڑ 63 لاکھ روپے سے زائد بتائی جا رہی ہے۔اسلام آباد کے علاقے آبپارہ میں ایک کوریئر آفس پر کارروائی کے دوران قطر بھیجے جانے والے ایک پارسل کی تلاشی لی گئی جس میں کتابوں کے اندر جذب کی گئی 2.670 کلوگرام وزنی منشیات برآمد کی گئی۔

(جاری ہے)

راولپنڈی کے چکلالہ گیریژن میں واقع میل آفس سے برطانیہ بھیجے جانے والے ایک اور پارسل سے 34 گرام ویڈ برآمد ہوئی۔

پشاور میں رنگ روڈ پر ایک شاپنگ مال کے قریب کھڑی گاڑی سے 6 کلوگرام چرس برآمد کی گئی، جبکہ اس کارروائی میں 3 ملزمان کو گرفتار کیا گیا۔دوسری جانب کراچی کے علاقے سٴْرجانی ٹاؤن میں اے این ایف نے ایک رکشے کی تلاشی کے دوران 132 کلوگرام چرس برآمد کی، جہاں سے 2 افراد کو گرفتار کیا گیا۔فیصل آباد میں بھی 2 مختلف کارروائیاں کی گئیں۔ ایک کارروائی کے دوران ایک موٹرسائیکل سوار سے 6 کلو چرس، 2.4 کلو افیون، 2.546 کلو آئس اور 231 گرام ہیروئن برآمد کی گئی جب کہ کمال پور انٹرچینج کے قریب ایک گاڑی سے 24 کلوگرام چرس برآمد ہوئی۔

دونوں مواقع پر ایک ایک ملزم کو حراست میں لیا گیا۔مزید برآں قبائلی علاقے طورخم میں زیرو لائن بارڈر کے قریب ایک ہوٹل کے پاس سے 1.5 کلوگرام آئس برآمد کی گئی۔ بلوچستان کے ضلع پنجگور کے علاقے بونستان میں اسمگلنگ کی غرض سے چھپائی گئی 24 کلوگرام چرس برآمد کی گئی۔اے این ایف ترجمان کا کہنا ہے کہ گرفتار ملزمان کے خلاف انسدادِ منشیات ایکٹ کے تحت مقدمات درج کر کے تفتیش کا آغاز کر دیا گیا ہے۔ منشیات نیٹ ورکس کو بے نقاب کرنے کے لیے مزید تحقیقات جاری ہیں۔