کوئٹہ،مشرقی بائی پاس کے قریب پولیس وین پر دستی بم حملے کے نتیجے میں ایس ایچ او سمیت 5 افراد زخمی

حملہ اس وقت ہوا جب پولیس کی گاڑی معمول کی گشت پر تھی ، دستی بم حملے کے نتیجے میں پولیس وین کو نقصان پہنچا،زخمیوں کو ہسپتال منتقل کر دیا گیا

فیصل علوی پیر 2 جون 2025 13:55

کوئٹہ،مشرقی بائی پاس کے قریب پولیس وین پر دستی بم حملے کے نتیجے میں ..

کوئٹہ(اردوپوائنٹ اخبار تازہ ترین۔02 جون 2025)کوئٹہ میں مشرقی بائی پاس کے قریب پولیس وین پر دستی بم حملے کے نتیجے میں ایس ایچ او سمیت 5 افراد زخمی ہو گئے، زخمیوں کو فوری طور پرہسپتال منتقل کردیاگیا،واقعہ کی اطلاع ملتے ہی پولیس کی بھاری نفری اور ریسکیو اہلکار موقع پر پہنچ گئے ، ریسکیو اہلکاروں نے زخمیوں کو سول ہسپتال منتقل کیا ،تفصیلات کے مطابق حملہ اس وقت ہوا جب پولیس کی گاڑی معمول کی گشت پر تھی۔

دستی بم حملے کے نتیجے میں پولیس وین کو نقصان پہنچا۔دھماکے کے بعد سیکیورٹی فورسز نے فوری طور پر علاقے کو گھیرے میں لے کر سرچ آپریشن شروع کر دیا ہے۔پولیس نے جائے وقوع سے شواہد جمع کرکے علاقے کی ناکہ بندی کرلی۔ حکام کا کہنا ہے کہ ملزمان کی تلاش شروع کردی گئی ہے۔

(جاری ہے)

یاد رہے کہ گزشتہ روز بھی کوئٹہ میںبم دھماکے نتیجے میں ایک شخص ہلاک جبکہ 4افراد زخمی ہوگئے تھے۔

دھماکے کی اطلاع ملتے ہی پولیس کی بھاری نفری اور ریسکیو اہلکار موقع پر پہنچ گئے تھے جنہوں نے زخمیوںکوفوری طورپربولان میڈیکل کمپلیکس منتقل کر دیاتھا ۔پولیس کا کہنا ہے کہ زخمیوں میں سے ایک شخص گاڑی میں موجود تھا جبکہ دیگر تین راہگیر تھے جو دھماکے کی زد میں آئے تھے۔حکام کے مطابق دھماکہ مقناطیسی ٹائم ڈیوائس بم کے ذریعے کیا گیا جو گاڑی کے ساتھ چپکایا گیا تھا۔

اس حوالے سے ایس ایچ او کا کہنا تھا کہ یہ ابھی واضح نہیں ہو سکا کہ دھماکہ خیز مواد گاڑی کے اندر نصب تھا یا باہر سے چپکایا گیا تھا تاہم تحقیقات جاری ہیں۔یہ بھی بتایا گیا تھا کہ ہلاک ہونے والے شخص کی شناخت قلات کے رہائشی حسین علی محمد حسنی کے نام سے ہوئی تھی۔پولیس کا کہنا تھا کہ دھماکے کا ہدف یہی دو افراد تھے۔دوسری جانب گزشتہ روز ہونے والے دھماکے کی تحقیقات کے حوالے سے پیش رفت سامنے آئی تھی۔

پولیس ذرائع کے مطابق دھماکے میں قلات کے رہائشی حسین علی محمد حسنی کو نشانہ بنایا گیا۔ دھماکا مقناطیسی بم کے ذریعے کیا گیا تھا، جسے گاڑی کی ڈرائیور سائیڈ پر چھپکایا گیا تھا۔دھماکے میں حسین علی محمد حسنی جاں بحق ہوگیا تھا اور اس کے ساتھ گاڑی میں سوار نبیل نامی شخص شدید زخمی ہوا۔ علاوہ ازیں دھماکے میں 3 راہگیر بھی زخمی ہوئے تھے۔