یونیورسٹی آف سرگودھا میں ایک روزہ تربیتی ورکشاپ کا انعقاد

پیر 2 جون 2025 19:00

سرگودھا (اُردو پوائنٹ اخبارتازہ ترین - اے پی پی۔ 02 جون2025ء) یونیورسٹی آف سرگودھا کی وزیر آغا لائبریری میں ''کوالیٹیٹو ریسرچ اور ڈیٹا اینالیسز: محققین کے لیے این ویوو کے استعمال میں مہارت'' کے عنوان سے ایک روزہ تربیتی ورکشاپ کا انعقاد کیا گیا۔ورکشاپ کا مقصد شرکاء کو کوالیٹیٹو تحقیق کے نظریاتی و عملی پہلوؤں سے روشناس کرانا اور تحقیق، لٹریچر ریویو، ڈیٹا اینالیسز اور رپورٹ نویسی میں این ویوو سافٹ ویئر کے مؤثر استعمال کی تربیت فراہم کرنا تھا۔

ورکشاپ کے ریسورس پرسن ڈاکٹر مرتضیٰ عاشق تھے جو جامعہ پنجاب سے تعلق رکھتے ہیں اور این ویوو کا استعمال کرتے ہوئے 50 سے زائد امپیکٹ فیکٹر تحقیقی مضامین کے مصنف ہیں۔ اس ورکشاپ میں چیف لائبریرین ڈاکٹر آصف نوید، فیکلٹی ممبران اور ریسرچ طلبہ سمیت 35 سے زائد شرکاء نے شرکت کی۔

(جاری ہے)

ورکشاپ کے مختلف سیشنز میں شرکاء کو کوڈنگ، تھیمیٹک اینالیسز، ڈسکورس اینالیسز اور کانٹینٹ اینالیسز جیسے کلیدی تحقیقی طریقہ کار کی تربیت دی گئی۔

اس کے ساتھ ساتھ این ویوو سافٹ ویئر کے اہم فیچرز جیسے نوڈ کریئیشن، کلاسیفیکیشن مینجمنٹ، ڈیٹا ویژولائزیشن (چارٹس و ماڈلز کی مدد سے)اور ایڈوانسڈ کوئری فنکشنز کے ذریعے معیاری ڈیٹا سے مفید نتائج اخذ کرنے کے عملی طریقے بھی سکھائے گئے۔اس موقع پر ڈاکٹر آصف نوید نے لائبریری کے انفراسٹرکچر، معلوماتی وسائل اور خدمات پر روشنی ڈالتے ہوئے بتایا کہ یونیورسٹی کی ریسرچ سپورٹ اسکیم طلبہ و اساتذہ کو تحقیقی معاونت فراہم کرنے کے لیے قائم کی گئی ہے اور یہ ورکشاپ اس کا ایک اہم حصہ ہے جو محققین کو کوالیٹیٹو ریسرچ کے جدید سافٹ ویئر کے استعمال میں مہارت دے کر تحقیق کے معیار اور پیداواری صلاحیت میں اضافہ کرے گی۔

ورکشاپ کو شرکاء نے نہایت مفید اور بامقصد قرار دیا، جو تحقیق کے جدید طریقہ کار سیکھنے اور عملی مہارتیں حاصل کرنے کا مؤثر ذریعہ ثابت ہوئی۔