علامہ اقبال اوپن یونیورسٹی نے داخلوں کی تاریخ میں توسیع کردی

جمعرات 21 اگست 2025 17:06

خانیوال (اُردو پوائنٹ اخبارتازہ ترین - اے پی پی۔ 21 اگست2025ء) علامہ اقبال اوپن یونیورسٹی نے داخلوں کی تاریخ میں توسیع کردی۔علامہ اقبال اوپن یونیورسٹی نے سمسٹر خزاں 2025میں پیش کئے گئے پروگراموں میں میٹرک،ایف اے،سر ٹیفکیٹ کورسز اوربی ایڈکے داخلہ جات میں 25اگست 2025جبکہ بی اے(ایسوسی ایٹ ڈگری)،بی ایس،بی بی اے،پی جی ڈی پروگرامزکے داخلہ جات میں یکم ستمبر 2025تک بغیر لیٹ فیس کے توسیع کر دی۔

یہ بات ریجنل ڈائریکٹر ملتان غلام حسین کھوسہ نے میڈیاسے بات چیت کرتے ہوئے بتائی۔انہوں نے مزید کہا کہ میٹرک،ایف اے/آئی کام،ایسوسی ایٹ ڈگری اوربی ایڈپروگرامزمیں طلباء وطالبات آن لائن یا داخلہ فارم پر اپلائی کرسکتے ہیں جبکہ دیگر پروگرامز میں داخلہ جات آن لائن اپلائی کر یں گے ۔

(جاری ہے)

آن لائن اپلائی کے لیے علاقائی کیمپس واقع شاہ رکن عالم کالونی ملتان میں فرنٹ ڈیسک بھی قائم کیا گیا ہے جہاں سے طلبا ء وطالبات کسی بھی اضافی فیس کے بغیر آن لائن داخلہ اپلائی کروا سکتے ہیں۔

مزیدبرآں یہ کہ تمام طلباء و طالبات داخلہ فیس الائیڈ بینک لمٹیڈ،مسلم کمرشل بینک لمٹیڈ،فرسٹ وویمن بینک لمٹیڈاور نیشنل بینک آف پاکستان کی کسی بھی برانچ یاجاز کیش،ایزی پیسہ اور یو پیسہ کے ذریعے بھی جمع کروا سکتے ہیں۔ تمام پراسپیکٹس یونیورسٹی ہذا کی ویب سائٹ www.aiou.edu.pkسے بھی ڈاؤن لوڈ کی جا سکتی ہیں۔داخلہ جات بارے مزید معلومات کے لیے فون نمبر061-9220201 & 61-9330410پر رابطہ کریں۔