جرمنی کی سابق وزیر خارجہ اینالینا بیئربوک اقوام متحدہ کی جنرل اسمبلی کی صدر منتخب

اقوام متحدہ (اُردو پوائنٹ اخبارتازہ ترین - اے پی پی۔ 03 جون2025ء) جرمنی کی سابق وزیر خارجہ اینالینا بیئربوک اقوام متحدہ کی جنرل اسمبلی کی نئی مدت کے لئے صدر منتخب ہو گئیں۔ جنرل اسمبلی کا 80 واں اجلاس ستمبر میں شروع ہو گا جب اینالینا بیئربوک 193 رکنی جنرل اسمبلی کے موجودہ صدر فلیمون یانگ کی جگہ لیں گی۔ جنرل اسمبلی کے موجودہ صدر فلیمون یانگ نےاینالینا بیئربوک کو جنرل اسمبلی کی نئی مدت کے لئے صدر منتخب ہونے مبارکباد دی ۔

انہوں نے کہا کہ یہ مناسب ہے کہ جنرل اسمبلی کے 80ویں سال میں قیادت کسی ایسے شخص کے ہاتھ میں آئے جس کے کیریئر کی تعریف کثیرالجہتی کے لیے غیر متزلزل وابستگی سے ہوئی ہو۔ اینالینا بیئربوک نے جنرل اسمبلی کی صدر منتخب ہونے پر رکن ممالک کی جانب سے حمایت کا شکریہ ادا کیا۔

(جاری ہے)

انہوں نے 167 ووٹ حاصل کیے، جو جیتنے کے لیے درکار 88 ووٹوں سے تقریباً دوگنا تھے جبکہ جرمنی سے ہی تعلق رکھنے والی اعلیٰ ترین سفارت کار ہیلگا شمڈ جن کا نام پہلے بیلٹ پیپر میں شامل نہیں تھا جو بعد میں تحریری طور پر شامل کیا گیا جنہوں نے 7 ووٹ حاصل کیے اور 14 ممالک نے ووٹنگ میں حصہ نہیں لیا۔

جرمنی نے ہیلگا شمڈ کو جنرل اسمبلی کی صدارت کے لیے نامزد کیا تھا لیکن حالیہ انتخابات میں ملک کے خارجہ امور کی سربراہ کے عہدے سے محروم ہونے کے بعد ان کی جگہ بیئربوک کو نامزد کر دیا گیا۔ اینالینا بیئربوک نے کہا کہ وہ رکن ممالک کی شکر گزار ہیں جنہوں نے بھاری اکثریت سے میری امیدواری کے حق میں ووٹ دیا ہے اور میں ان مشکل وقتوں میں تمام رکن ممالک کے ساتھ مل کر کام کرنے کی منتظر ہوں۔

انہوں نے سب کی خدمت کرنے کے عزم کا اظہار کرتے ہوئے کہا کہ میرا پہلا کلیدی مقصد رکن ممالک کی تجدید، دوبارہ توجہ مرکوز کرنے اور تنظیم کو 21ویں صدی کے لیے موزوں بنانے کے لیے تعاون کرنا ہو گا۔ انہوں نے مستقبل کے لیے معاہدہ کی اہمیت پر زور دیا۔ انہوں نے کہا کہ سلامتی کونسل اور پیس بلڈنگ کمیشن کے ساتھ قریبی تعاون سے امن اور سلامتی کے معاملات کے حوالے سے جنرل اسمبلی کے کردار کو مزید مضبوط کرنا کلیدی اہمیت کا حامل ہے۔

اقوام متحدہ کے سیکرٹری جنرل انتونیو گوتریش نے عالمی چیلنجز پر روشنی ڈالتے ہوئے اس بات پر زور دیا کہ بے اعتمادی اور تقسیم عروج پر ہے۔ انہوں نے کہا کہ ہمارے ادارے اور ڈھانچے اب بھی گزشتہ کل کی دنیا کی عکاسی کرتے ہیں، نہ کہ آنے والے مستقبل کے ۔ یہ ہمارے لیے متحد ہونے، مشترکہ حل تلاش کرنے اور ان چیلنجز کا مقابلہ کرنے کے لیے اقدامات کرنے کا لمحہ ہے۔ انہوں نے اینالینا بیئربوک کی مکمل حمایت کا اظہار کرتے ہوئے ان کی سابقہ ​​حکومت اور سفارتی تجربے کو سراہا۔ انہوں نے مزید کہا کہ ہمیں اس تاریخی اہمیت کو نہیں بھولنا چاہیے کہ وہ جنرل اسمبلی کی صدر منتخب ہونے والی پانچویں خاتون ہیں۔