پشاور، ہسپتالوں میں خریداری کیلئے آلات کی قیمتوں کی فہرست جاری

منگل 3 جون 2025 14:40

پشاور (اُردو پوائنٹ اخبارتازہ ترین - اے پی پی۔ 03 جون2025ء) پشاور سمیت صوبہ بھر میں ہسپتالوں میں خریداری کیلئے آلات کی قیمتوں کی فہرست جاری کر دی گئی۔محکمہ صحت خیبرپختونخوا کے مطابق صوبہ بھر کے سرکاری ہسپتالوں اور صحت کے اداروں کے لیے طبی آلات، فرنیچر، آلات اور دیگر ضروریات کی خریداری کیلئے منظور شدہ قیمتوں کی فہرست جاری کر دی ہے، اس فہرست میں 400 سے زائد آلات کی تفصیلات اور ان کی قیمتیں شامل ہیں جو اگلے ماہ 30 جون تک نافذ العمل رہیں گی۔

اس سلسلے میں خریداری کیلئے شرائط کے مطابق تمام ضلعی صحت آفیسر اور ہسپتالوں کے میڈیکل سپرنٹنڈنٹس کو سپلائی آرڈر جاری کرتے وقت انسانی وسائل کی دستیابی، انفراسٹرکچر کی تکمیل،مالی وسائل کی دستیابی،بجلی کی سپلائی،آلات کی غیر ضروری ذخیرہ اندوزی نہ ہو نے کا خیال رکھننے کی ہدایت کی گئی ہے۔

(جاری ہے)

اسی طرح کارکردگی کی ضمانت کا تعین بھی کیا گیا ہے جس کے مطابق سپلائرز کو آرڈر کی کل رقم کا 10فیصد بطور پرفارمنس سکیورٹی جمع کرانا ہوگا اس ضمن میں محکمہ صحت نے ترسیل اور ادائیگی کا نظام بھی وضع کیا ہے جس کے مطابق سپلائی مکمل ہونے پر فوری انسٹالیشن اور معائنہ کیا جائے گا اورکسی بھی شکایت کو پروکیورمنٹ سیل کو رپورٹ کیا جائے گا۔

اس طرح ادائیگی وقت پر یقینی بنائی جائے گی بصورت دیگر ذمہ دار افسروں کے خلاف کارروائی ہوگی اعلامیہ کے مطابق اہم طبی آلات کی قیمتیں مقرر کی گئی ہیں ان میں24 گھنٹے بلڈ پریشر مانیٹر امریکن ساختہ کی قیمت11لاکھ49ہزار9سو روپے،چینی ساختہ انستھیزیا مشین کی قیمت 77لاکھ37ہزار5سو روپے ، کورین ساختہ ڈیجیٹل ایکسرے پلانٹ کی قیمت 2 کروڑ 15 لاکھ روپے ،چینی ساخت کے آکسیجن کنسنٹریٹر کی قیمت 2لاکھ75ہزار روپے جبکہ چینی ساختہ بے بی انکیوبیٹر کی قیمت 14لاکھ85ہزار روپے مقرر کی گئی ہے۔