بجٹ 2025-26: عوام پر پیٹرولیم کاربن لیوی کا بوجھ ڈالنے کا فیصلہ

منگل 3 جون 2025 20:46

اسلام آباد(اُردو پوائنٹ اخبارتازہ ترین - آن لائن۔ 03 جون2025ء)وفاقی بجٹ میں عوام پر مزید معاشی بوجھ ڈالنے کی تیاریاں مکمل کر لی گئی ہیں۔ ذرائع کے مطابق آئندہ مالی سال کے بجٹ میں پیٹرولیم مصنوعات پر کاربن لیوی عائد کرنے کا فیصلہ کر لیا گیا ہے۔ ابتدائی مرحلے میں پیٹرول اور ڈیزل پر فی لیٹر ڈھائی روپے کاربن لیوی لگائی جائے گی، جبکہ دوسرے مالی سال میں یہ لیوی بڑھا کر پانچ روپے فی لیٹر کر دی جائے گی۔

ذرائع خزانہ کے مطابق کاربن لیوی کے نفاذ سے آئندہ مالی سال کے دوران حکومت کو تقریباً 45 ارب روپے تک آمدن حاصل ہونے کا تخمینہ ہے، جبکہ مالی سال 2027 تک یہ آمدن دگنی ہو سکتی ہے۔ تاہم کاربن لیوی کے نتیجے میں پیٹرولیم مصنوعات کی قیمتوں میں مزید اضافے کا خدشہ بھی ظاہر کیا جا رہا ہے۔

(جاری ہے)

ذرائع کا کہنا ہے کہ کاربن لیوی صرف پیٹرول اور ڈیزل پر عائد کی جائے گی، جبکہ مٹی کے تیل اور لائٹ ڈیزل آئل کو اس سے مستثنیٰ رکھا گیا ہے۔

پیٹرول اور ڈیزل پر یہ لیوی پٹرولیم ڈیولپمنٹ لیوی (PDL) کے ساتھ ہی وصول کی جائے گی۔مزید برآں، آئندہ بجٹ میں کاربن لیوی کے نفاذ کے لیے الگ سے کوئی قانون سازی نہیں کی جائے گی۔ ذرائع کے مطابق اڑھائی روپے فی لیٹر کاربن لیوی کو گرین بجٹنگ کے مقاصد کے لیے استعمال کیا جائے گا۔ معاشی ٹیم اور آئی ایم ایف کے درمیان بجٹ سے متعلق مذاکرات مکمل ہو چکے ہیں اور مجوزہ اقدامات کو حتمی شکل دے دی گئی ہے۔