Live Updates

ٓ فیصل آباد،ایڈیشنل ڈائریکٹر لائیوسٹاک کا خانوآنہ مویشی منڈی ستیانہ روڈ کا تفصیلی دورہ

منگل 3 جون 2025 21:40

ٰ فیصل آباد (اُردو پوائنٹ اخبارتازہ ترین - آن لائن۔ 03 جون2025ء)ایڈیشنل ڈائریکٹر لائیوسٹاک فیصل آبادڈاکٹر محمد قیصر خلیق قریشی نے خانوآنہ مویشی منڈی ستیانہ روڈ کا تفصیلی دورہ کیا۔ یہ دورہ عیدالاضحی کے تناظر میں جانوروں کی صحت، ویٹرنری سہولیات اور چیچڑیوں سے بچاؤ کیلئے حفاظتی اقدامات کا جائزہ لینے کیلئے کیا گیا۔ ڈپٹی ڈائریکٹر لائیوسٹاک ڈاکٹر رانا اعجاز احمد خاں بھی اس موقع پرموجود تھے۔

ایڈیشنل ڈائریکٹر لائیوسٹاک نے منڈی میں قائم ویٹرنری کیمپس، طبی عملے کی حاضری، ادویات کی دستیابی اور چیچڑیوں سے بچاؤ کیلئے سپرے سمیت دیگر حفاظتی انتظامات کا تفصیلی معائنہ کیا۔انہوں نے اس موقع پر کہا کہ قربانی کے جانوروں کی صحت اور صفائی نہ صرف جانوروں بلکہ عوامی صحت کے لئے بھی نہایت اہم ہے۔

(جاری ہے)

انہوں نے جانوروں سے انسانوں میں منتقل ہونے والی بیماریوں کی مؤثر روک تھام کیلئے تمام دستیاب وسائل کو بروئے کار لانے کی ہدایت کی۔

ایڈیشنل ڈائریکٹر لائیوسٹاک نے منڈی میں دستیاب سہولیات پر اطمینان کا اظہار کرتے ہوئے ہدایت کی کہ عید کے ایام میں بھی عوام کو معیاری ویٹرنری خدمات بلا تعطل فراہم کی جائیں۔محکمہ لائیوسٹاک عیدالاضحیٰ کے موقع پر ضلع فیصل آباد کی تمام مویشی منڈیوں میں ویٹرنری خدمات کی فراہمی کو یقینی بنا رہا ہے جن میں جانوروں کی بیماریوں کی تشخیص، علاج معالجہ، حفاظتی ویکسینیشن اور آگاہی مہمات شامل ہیں۔ان اقدامات کا مقصد مویشی فروشوں اور خریداروں کو ایک محفوظ، صحت مند اور سہل ماحول فراہم کرنا ہے۔