نیو یارک: فروغ امن میں خواتین فوٹوگرافروں کے کام کی نمائش کی تیاری

اسلام آباد (اُردو پوائنٹ ۔ UN اردو۔ 04 جون 2025ء) اقوام متحدہ رواں ماہ نیویارک کے فوٹو وِل فیسٹیول میں تصویری نمائش کی تیاری کر رہا ہے جس کا مقصد دنیا کے انتہائی غیرمستحکم علاقوں میں فروغ امن کے لیے خواتین اور ان کے اتحادیوں کی قیادت، جرات اور ان کے کام کے اثرات کو اجاگر کرنا ہے۔

قیام امن میں خواتین کے نمایاں کردار کے موضوع پر منعقدہ اس نمائش میں دنیا بھر کے علاقوں میں خواتین کی بنائی اصل تصاویر دکھائی جائیں گی اور امن و حقوق کے فروغ کے لیے نچلی سطح پر سرگرم خواتین اور اقوام متحدہ کی امن کاروں کے کام کو نمایاں کیا جائے گا جن کی داستانیں عموماً نگاہوں سے اوجھل رہتی ہیں۔

(جاری ہے)

یہ نمائش سلامتی کونسل کی قرارداد 1325 (2000) کی منظوری کو 25 برس مکمل ہونے کے تناظر میں منعقد کی جا رہی ہے جو خواتین، امن اور سلامتی کے ایجنڈے کو واضح کرتی ہے۔ اس ایجنڈے میں خواتین پر جنگوں کے غیر متناسب اثرات کے علاوہ تشکیل امن، اعتماد سازی اور انقلابی تبدیلی لانے میں ان کے قائدانہ کردار کا اعتراف کیا گیا ہے۔

یہ پہلی قرارداد تھی جس میں بین الاقوامی امن و سلامتی کے حصول اور تنازعات کی روک تھام اور ان کے حل اور امن کاری میں خواتین کے کردار کا اعتراف کیا گیا۔

خواتین کے عالمی دن پر اقوام متحدہ کے سیکرٹری جنرل انتونیو گوتیرش نے کہا تھا کہ صںفی مساوات کے لیے جدوجہد محض انصاف کا معاملہ نہیں بلکہ اس کا تعلق خواتین کو بااختیار بنانے سے ہے۔

معاشرتی تبدیلی میں خواتین کا کردار

نمائش میں رکھی جانے والی تصاویر ابیی، قبرص، وسطی جمہوریہ افریقہ، جمہوریہ کانگو، ہیٹی، کوسوو، لبنان، موزمبیق، مقبوضہ فلسطینی علاقے، جنوبی سوڈان اور سوڈان میں لی گئی ہیں جو مضبوطی، مزاحمت اور تبدیلی کی اجتماعی داستان سناتی ہیں۔

کوسوو سے تعلق رکھنے والی فوٹوگرافر صحافی لارا حسنی کا کہنا ہے کہ امن عمل میں خواتین کے کردار کو عموماً نظرانداز کر دیا جاتا ہے یا پوری طرح سامنے نہیں لایا جاتا۔ ان تصاویر کا مقصد اس حوالے سے تبدیلی لانا ہے تاکہ دنیا ان خواتین کو دیکھ اور سن سکے جو معاشروں کی تعمیرنو اور تبدیلی کے عمل میں قیادت کر رہی ہیں۔

ہیٹی سے تعلق رکھنے والی کلائیون سینٹیل اپنے ملک کی خواتین اور لڑکیوں کو اعتماد پیدا کرنے اور اپنے حقوق کے لیے کھڑا ہونے میں مدد دیتی ہیں۔

امن و انصاف کی معمار

اس نمائش کی بدولت خواتین کو محض مسائل کی متاثرین سمجھنے کے بجائے امن و انصاف کی معمار کے طور پر دیکھنے میں مدد ملے گی۔ اس کے ذریعے حکومتوں، بین الاقوامی اداروں اور تمام لوگوں کو یہ پیغام جائے گا کہ وہ خواتین، امن اور سلامتی کے ایجنڈے سے متعلق اپنے وعدوں کی تجدید کریں جو آج بھی اسی قدر اہم ہے جتنا کہ 25 سال قبل تھا۔

یہ نمائش 7 تا 22 جون نیویارک سٹی کے بروکلین برج پارک میں منعقد ہو گی۔ بعدازاں اس کا دیگر ممالک میں انعقاد بھی عمل میں آئے گا اور آخر میں یہ تصاویر برسلز میں یورپی پارلیمنٹ اور پھر اکتوبر میں اقوام متحدہ کے ہیڈکوارٹر اور دیگر جگہوں پر دکھائی جائیں گی۔