سوشل میڈیا کے غلط استعمال اور غیرت کے نام پر قتل کیخلاف قرارداد منظور

اسلام آباد ( اُردو پوائنٹ اخبارتازہ ترین۔ 06 اگست 2025ء ) قومی اسمبلی نے سوشل میڈیا کے غلط استعمال کی روک تھام اور غیرت کے نام پر قتل کے خلاف قرارداد کثرتِ رائے سے منظور کرلی۔ تفصیلات کے مطابق قومی اسمبلی اجلاس کے دوران غیرت کے نام پر قتل کے خلاف قرارداد پیش کی گئی، پیپلز پارٹی کی رکن اسمبلی شاہدہ رحمانی نے یہ قرارداد اسمبلی میں پیش کی، جس میں کہا گیا کہ حالیہ عرصے میں کچھ صوبوں میں غیرت کے نام پر قتل ہوئے، جن کی روک تھام ضروری ہے اور حکومت اس سلسلے میں اقدامات کرے۔

سوشل میڈیا سے متعلق قرارداد کے متن میں کہا گیا کہ ایوان سوشل میڈیا کے غلط استعمال کو روکنے کے لیے فوری اقدامات کا مطالبہ کرتا ہے اور اس سلسلے میں وفاقی حکومت صوبائی حکومتوں کے ساتھ مشاورت کے بعد سوشل میڈیا کے درست استعمال کے لیے قوانین بنائے، اس کے علاوہ ڈیجیٹل حقوق، قواعد اور اخلاقیات کی آگاہی کے لیے بھی اقدامات کیے جائیں۔

(جاری ہے)

معلوم ہوا ہے کہ اجلاس کے دوران وزیر مملکت داخلہ طلال چوہدری کی جانب سے پاکستان شہریت ترمیمی بل 2025ء قومی اسمبلی میں پیش کیا گیا، تاہم تحریک انصاف کے ایم این اے شہریار آفریدی نے اعتراض کرتے ہوئے کہا کہ ’شہریت بل ہے کیا؟ اس کے متعلق ایوان کو تفصیل سے بتایا جائے‘، اس پر وزیر مملکت داخلہ نے بتایا کہ ’یہ بل سینیٹ اور قائمہ کمیٹی کے بعد منظور ہوا، بہت ممالک میں دوسری شہریت کے لیے اپنی شہریت ترک کرنا پڑتی تھی لیکن اب اب اوورسیز پاکستانیوں کو دوسرے ملک کی شہریت حاصل کرنے کے لیے پاکستانی شہریت ترک نہیں کرنا پڑے گی، جرمنی سمیت کئی ممالک کے ساتھ ہمارا دوہری شہریت کا معاہدہ ہوگیا ہے‘۔

علاوہ ازیں موٹر وہیکل انڈسٹری ڈویلپمنٹ بل 2025 بھی قومی اسمبلی میں پیش کیا گیا جسے کمیٹی کے سپرد کر دیا گیا، وزیر مملکت داخلہ طلال چوہدری نے سوسائٹیز رجسٹریشن ترمیمی بل 2025 قومی اسمبلی میں پیش کیا جسے منظور کر لیا گیا جب کہ وزیر مملکت طلال چوہدری نے وفاقی ترقیاتی ادارہ ترمیمی آرڈیننس 2025ء اور وفاقی وزیر رانا تنویر حسین نے نیشنل ایگری ٹریڈ اینڈ فوڈ سیفٹی اتھارٹی آرڈیننس 2025ء بھی پیش کیا، اس موقع پر پیپلز پارٹی کے رکن سید نوید قمر نے کہا کہ ’ابھی ایک ہمارا سیشن ختم ہوا، دھڑا دھڑا آرڈیننس لاتے رہیں گے تو کیا آپ پارلیمنٹ کی رٹ کو انڈر مائن نہیں کر رہے ہیں؟‘، رانا تنویر حسین نے جواب دیا کہ ’آرڈیننس آئین کا حصہ ہیں، کوئی آرڈیننس ضرورت کے بغیر کبھی جاری نہیں ہوتا‘۔