جناح میڈیکل کمپلیکس کی تعمیر میں اسپیشلائزڈ ہیلتھ کئیر کے عالمی معیار کو ملحوظ خاطر رکھا جائے،وزیراعظم

بدھ 6 اگست 2025 17:46

اسلام آباد(اُردو پوائنٹ اخبارتازہ ترین - این این آئی۔ 06 اگست2025ء)وزیراعظم محمد شہبازشریف نے ہدایت کی ہے کہ جناح میڈیکل کمپلیکس کی تعمیر میں اسپیشلائزڈ ہیلتھ کئیر کے عالمی معیار کو ملحوظ خاطر رکھا جائے،جناح میڈیکل کمپلیکس آزاد کشمیر و گلگت بلتستان سمیت چاروں صوبوں کے مریضوں کیلئے شفاء کا عالمی معیار کا ہسپتال ہوگا،جناح میڈیکل کمپلیکس کے مختلف بلاکس کے نام، صوبوں کے نام پر رکھے جائیں،جناح میڈیکل کمپلیکس کی تعمیر، اسٹاف کی بھرتیوں میں شفافیت و میرٹ کو اولین ترجیح دی جائے،تعمیری کام کے معیار کو اولین بنانے اور شفایت کیلئے تھرڈ پارٹی ویلیڈیشن یقینی بنائی جائے۔

بدھ کووزیرِ اعظم محمد شہباز شریف کی زیر صدارت جناح میڈیکل کمپلیکس کی تعمیر پر پیش رفت کے حوالے جائزہ اجلاس یہاں منعقد ہوا۔

(جاری ہے)

اجلاس میں وزیرِ اعظم کو اسپتال کے کنسیپٹ ڈیزائین، بورڈ کی تشکیل، اراضی اورہسپتال سے متصل مجوزہ کمرشل سینٹر کے حوالے سے پیش رفت سے آگاہ کیا گیا۔ اجلاس کو بتایا گیا کہ کنسیپٹ ڈیزائن، اراضی کی منتقلی اور بورڈ کی تعیناتیاں حتمی مراحل میں ہیں. اجلاس کو مزید بتایا گیا کہ تعمیر کے بہترین معیار کو یقینی بنانے کیلئے جیو ٹیک اسٹڈی اور اسپتال کے اسلام آباد اور گرد و نواح کے رہائشیوں پر اثرات کی افادیت میں اضافے کیلئے سوشل امپیکٹ اسٹڈیز جاری ہیں۔

اجلاس کو مختلف اقدامات کی معینہ مدت اور اہداف پر بھی بریفنگ دی گئی۔ وزیراعظم نے کہاکہ ٹرشری ہسپتالوں پر مریضوں کے دباؤ کو کم کرنے کیلئے اسلام آباد میں پرائمری اور سیکنڈری ہیلتھ کیئیر کے نظام کی بہتری کا منصوبہ پیش کیا جائے،اللہ کے فضل و کرم سے پی کے ایل آئی بہترین طور سے مریضوں کیلئے شفاء کا باعث بن رہا ہے۔ وزیر اعظم نے کہاکہ جناح میڈیکل کمپلیکس کو پی کے ایل آئی سے بھی بہتر اور بین الاقوامی معیار کی سہولیات ہر مشتمل اسپتال بنائیں گے۔

وزیر اعظم نے کہاکہ ہسپتال میں جینٹوریل سمیت تمام دیگر متعلقہ سروسز میرٹ پر آؤٹ سورس کی جائیں۔اجلاس میں وفاقی وزراء احسن اقبال، احد خان چیمہ، سید مصطفی کمال، وزیرِ اعظم کے کوارڈینیٹر برائے صحت ڈاکٹر مختار بھرتھ، چیئرمین پی کے ایل آئی پروفیسر ڈاکٹر سعید اختر اور متعلقہ اعلی حکام نے شرکت کی ۔