کراچی میں زلزلے آنے کا سلسلہ جاری، اتوار سے ابتک زلزلے کے 26 جھٹکے

زلزلے کی شدت ریکٹرسکیل پر 3.1 ریکارڈ کی گئی، جبکہ زلزلے کی گہرائی تقریباً 80 کلومیٹر اور گہرائی تقریباً 80 کلومیٹر تھی، شہری متواترزلزلوںکے جھٹکے آنے سے خوفزدہ

فیصل علوی بدھ 4 جون 2025 12:07

کراچی(اردوپوائنٹ اخبار تازہ ترین۔04 جون 2025)شہر قائد کراچی میں زلزلے آنے کا سلسلہ جاری، اتوار سے ابتک زلزلے کے 26 جھٹکے محسوس کئے گئے، شہری متواترزلزلوں کے جھٹکے آنے سے خوفزدہ، زلزلہ پیما مرکز اور نیشنل سونامی سینٹر کے مطابق زلزلے کی شدت ریکٹرسکیل پر 3.1 ریکارڈ کی گئی، جبکہ زلزلے کی گہرائی تقریباً 80 کلومیٹر تھی۔ زلزلے کا مرکز ملیر سے تقریباً 10 کلومیٹر مشرق کی جانب تھا۔

بتایا گیا ہے کہ قائدآباد، شاہ لطیف ٹاون بھینس کالونی، ڈی ایچ اے سٹی، کورنگی اور دیگر علاقوں میں ایک بار پھر زلزلے کے شدید جھٹکے محسوس کئے گئے جس کے باعث عوام خوفزدہ ہو کر گھروں سے نکل آئے۔کراچی میں اتوار کی شام سے کراچی میں زلزلوں کا سلسلہ شروع ہوا تھا جو ابھی تک تھم نہیں سکا ہے اور زلزلہ سے متاثرہ علاقوں کے شہری شدید خوف میں مبتلا ہیں۔

(جاری ہے)

شہر میں مسلسل چوتھے دن بھی زلزلے کے جھٹکے رپورٹ ہورہے ہیں۔ماہرین نے ان زلزلوں کی سائنسی وجہ بیان کی اور کہا ہے کہ ان سے شہریوں کو گھبرانے کی ضرورت نہیں کیونکہ اب آفٹر شاکس کا سلسلہ جاری ہے جو کچھ روز تک یوں ہی جاری رہ سکتا ہے۔یاد رہے کہ گزشتہ روز بھی کراچی میں گزشتہ 24 سے 48 گھنٹوں کے دوران 19 مرتبہ زلزلے کے جھٹکے محسوس کئے گئے تھے۔

شہر قائد میں زمین کی لرزش تھم نہ سکی، زلزلے کے 19ویں جھٹکے نے شہریوں کو ایک بار پھر تشویش میں مبتلا کر دیاتھا زلزلے کی شدت 2.5 ریکارڈ کی گئی تھی۔زلزلہ پیما مرکز کے مطابق صبح 11 بجکر 34 منٹ پرزلزلے کے جھٹکے محسوس کئے گئے جن کا مرکز شمال مشرقی ڈی ایچ اے سٹی سے 15 کلومیٹر کے فاصلے پر تھا۔ زلزلے کی گہرائی 30 کلومیٹر زیر زمین ریکارڈ کی گئی تھی۔

اس سے قبل بھی کراچی کے مختلف علاقوں میں پھر زلزلے کے جھٹکے محسوس کئے گئے جن کی شدت 3.4 ریکارڈ کی گئی تھی۔زلزلہ پیما مرکز زلزلے کے جھٹکے گزشتہ صبح پونے 7 بجے قریب بھی محسوس کئے گئے تھے۔ زلزلے کا مرکز جنوب مغرب کورنگی تھا۔زلزلہ پیما مرکز کے مطابق زلزلے کے جھٹکے آئندہ2 روز تک محسوس کئے جاسکتے تھے۔ لانڈھی میں زلزلے کی وجہ سے کئی مکانات کی دیواروں پر دراڑیں پڑ گئیں اور شہری خوف کے مارے گھروں سے باہر نکل آئے تھے۔

یکے بعد دیگرے زلزلے کے جھٹکوں سے لانڈھی میں خوف وہراس پھیل گیا تھا زلزلے کے جھٹکوں کے بعد شہری ایک بار پھر گھروں سے باہرنکل آئے متعدد گھروں کی دیواروں پر دراڑیں پڑگئیں تھیں۔ خواتین، بزرگ اور بچے پارکوں میں موجود ہیں۔ علاقے کی مساجد سے اذانیں دی جانے لگیں تھیں۔