ایل پی جی سستی کر دی گئی

لاہور (اُردو پوائنٹ اخبارتازہ ترین۔ 31 جولائی2025ء) ایل پی جی سستی کر دی گئی، اوگرا کی جانب سے ایل پی جی کی قیمت میں 17 روپے 74 پیسے فی کلو کمی کر دی گئی۔ تفصیلات کے مطابق : آئل اینڈ گیس ریگولیٹری اتھارٹی (اوگرا) نے ایل پی جی کی قمیت میں بڑی کمی کر دی اور نوٹیفکیشن بھی جاری کردیا۔ اوگرا کی جانب سے جاری نوٹیفکیشن کے مطابق ایل پی جی کی قیمت میں 17 روپے 74 پیسے فی کلو کمی کر دی گئی ہے اور 11.8 کلو کا گھریلو سلنڈر 209روپے 24 پیسے سستا کر دیا گیا ہے۔

اوگرا نے بتایا کہ اگست کے لیے گھریلو سلینڈر کی قمیت 2541 روپے 36 پیسے مقرر کردی گئی ہے جبکہ جولائی میں گھریلو سلینڈر کی قمیت 2750روپے 60پیسے تھی۔ نوٹیفکیشن کے مطابق جولائی میں ایل پی جی کی فی کلو قیمت 233روپے مقرر تھی تاہم اگست کے لیے ایل پی جی کی فی کلو قیمت قیمت215روپے 36پیسے مقرر کی گئی ہے۔

(جاری ہے)

دوسری جانب رواں ماہ کے دوران 2 مرتبہ پٹرولیم مصنوعات کی قیمتوں میں بڑا اضافہ ہونے کے بعد اگلے ماہ کے آغاز سے پٹرول اور ڈیزل سستا ہونے کا امکان ہے۔

میڈیا رپورٹس میں دعوٰی کیا جا رہا ہے کہ یکم اگست سے ملک میں پٹرولیم مصنوعات کی قیمتوں میں بڑی کمی ہو سکتی ہے۔ بتایا گیا ہے کہ عالمی مارکیٹ میں تیل کی قیمتوں میں نمایاں کمی ہوئی، جس کے بعد یکم اگست سے پاکستان میں بھی پٹرولیم مصنوعات سستی کرنے پر غور کیا جا رہا ہے۔ یکم اگست ست پٹرولیم مصنوعات کی قیمتوں میں 9 روپے تک کمی کا امکان ہے۔

بتایا گیا ہے کہ پٹرول کی ایکس ریفائنری قیمت میں 9 روپے7 پیسے اور ڈیزل کی ایکس ریفائنری قیمت میں3 روپے73پیسے کمی ریکارڈ ہوئی ہے۔ پٹرول کی ایکس ریفائنری قیمت 168روپے 73پیسے سے کم ہوکر 159روپے 66 پیسے ہو گئی ہے۔ اس کے علاوہ عالمی مارکیٹ میں پٹرول کی فی بیرل قیمت75.27ڈالر سے کم ہو کر73.19 ڈالر پر آگئی جبکہ پیٹرولیم پر فی بیرل پریمیم 9.61ڈالر سے کم ہو کر6.74 ڈالر پر آگیا، کسٹمز ڈیوٹی بھی 15روپے 33 پیسے سے کم ہو کر 14روپے 29 پیسے پر آگئی۔

بتایا گیا ہے کہ عالمی مارکیٹ میں تیل کی قیمتوں میں کمی کے بعد اوگرا کی جانب سے پٹرولیم مصنوعات میں کمی سے متعلق سمری تیار کر کے وزارت خزانہ کو بھجوائی جائے گی، جس کے بعد وزیر اعظم پٹرولیم مصنوعات سستی کرنے یا نہ کرنے سے متعلق حتمی فیصلہ کریں گے۔ ذرائع کے مطابق حکومت پٹرولیم لیوی میں مزید اضافہ کر کے عوام کو ریلیف سے محروم بھی رکھ سکتی ہے۔