ڈیفنس تشدد کیس، میں کوئی کیس نہیں کرنا چاہتا، متاثر نوجوان سدھیر نے ملزم سلمان فاروقی کو معاف کردیا

میں نے ملزم کو معاف کر دیا ہے، عدالت جو بھی فیصلہ کرے مجھے کوئی اعتراض نہیں، کراچی کی جوڈیشل مجسٹریٹ جنوبی کی عدالت میں ڈیفنس تشدد کیس کی سماعت ہوئی

فیصل علوی جمعرات 5 جون 2025 11:25

ڈیفنس تشدد کیس، میں کوئی کیس نہیں کرنا چاہتا، متاثر نوجوان سدھیر نے ..

کراچی(اردوپوائنٹ اخبار تازہ ترین۔05 جون 2025)کراچی کی جوڈیشل مجسٹریٹ جنوبی کی عدالت میں ڈیفنس تشدد کیس کی سماعت ہوئی ، پولیس نے مقدمے میں نامزد ملزم سلمان فاروقی ودیگر کو عدالت میں پیش کیا،متاثرہ نوجوان سدھیر بھی عدالت میں پیش ہوا ،تشدد کا نشانہ بننے والے نوجوان سدھیر نے عدالت میں ملزم سلمان فاروقی کو معاف کر دیا،سدھیر نے عدالت میں بیان دیتے ہوئے کہا کہ میں کوئی کیس نہیں کرنا چاہتا، ملزم کو معاف کر دیا ہے ،عدالت نے ابتدائی سماعت کے بعد دونوں ملزمان کو جوڈیشل ریمانڈ پر جیل بھیجنے کا حکم جاری کیا اور تفتیشی افسر کو آئندہ سماعت پر پیش رفت رپورٹ پیش کرنے کی ہدایت کی۔

سماعت کے دوران عدالت نے متاثرہ نوجوان سدھیر سے دریافت کیا کہ کیا اسے کسی قسم کے دباو یا خطرے کا سامنا ہے؟ جس پر نوجوان نے جواب دیا کہ میں کوئی کیس نہیں کرنا چاہتا، میں نے ملزم کو معاف کر دیا ہے ، عدالت جو بھی فیصلہ کرے مجھے کوئی اعتراض نہیں۔

(جاری ہے)

سدھیر نے عدالت کے روبرو ملزم کی شناخت کرتے ہوئے بیان دیا کہ مجھے علم نہیں تھا کہ عدالت نے بلایا ہے آج وکیل کے کہنے پر پیش ہوا ہوں۔

واضح رہے کہ اس سے قبل کراچی کے علاقے ڈیفنس میں نوجوان پر تشدد کے الزام میں گرفتار ملزم سلمان فاروقی کی عدالت میں پیشی کے موقع پر وکلاءاور شہریوں نے احاطہ عدالت میں پٹائی کر دی تھی۔عدالت سے واپسی پر ملزمان کو لے جاتے ہوئے احاطے میں موجود سائلین نے شور مچایا تھا۔ سائیلین نے ملزمان کو دیکھ کر کہا مارو مارو جس پر پولیس ملزمان کو بھگاتے ہوئے موبائل تک لے گئی اور سٹی کورٹ سے روانہ ہوگئی تھی۔

اسی دوران چند شہری اور وکلاء نے ملزم سلمان فاروقی کو تھپڑمار دئیے تھے۔عدالت سے واپس لے جاتے ہوئے ایک وکیل کی جانب سے دوبارہ ملزم سلمان کو تھپڑ ماراگیاتھا۔قبل ازیںعدالت نے ڈیفنس فیز 6 خیابان اتحاد میں شہری پر تشدد کرنے والے بااثر شخص کو 2 روزہ جسمانی ریمانڈ پر پولیس کے حوالے کیا تھا ۔گذری پولیس نے واقعے میں ملوث دونوں ملزمان کو سٹی کورٹ میں جوڈیشل مجسٹریٹ جنوبی مزمل علی سومرو کی عدالت میں پیش کیا۔

عدالت نے ملزم سے استفسار کیا کون وکیل ہے آپ کا، ملزم نے جواب دیا کہ نعیم قریشی کو بلایا جائے۔عدالت نے حکم دیا تھاکہ نعیم قریشی کو بلایا جائے، ملزم سلمان فاروقی کے وکیل نعیم قریشی عدالت میں پیش ہوئے تھے۔ ملزم سلمان فاروقی کی جانب سے درخواست ضمانت دائر کردی گئی تھی۔درخواست ملزم کے وکیل نعیم قریشی نے دائر کی۔ نعیم قریشی نے موقف دیا کہ ملزم کیخلاف دھمکیاں دینے کا مقدمہ جو کہ قابل ضمانت ہے۔پولیس نے عدالت میں واقعے کی ابتدائی رپورٹ بھی جمع کرائی تھی۔