Live Updates

سمبڑیال الیکشن سب کے سامنے ہے، پی ٹی آئی کی مقبولیت کم نہیں ہوئی،فواد چوہدری

سیاست میں اتار چڑھاو آتا رہتا ہے،ووٹ صرف بانی پی ٹی آئی عمران خان کا ہے،190ملین پاونڈ کیس میں سزا معطلی ہوتے نظر نہیں آرہی،سابق وفاقی وزیر کی گفتگو

فیصل علوی جمعہ 6 جون 2025 11:02

سمبڑیال الیکشن سب کے سامنے ہے، پی ٹی آئی کی مقبولیت کم نہیں ہوئی،فواد ..

اسلام آباد(اردوپوائنٹ اخبار تازہ ترین۔06 جون 2025ئ)سابق وفاقی وزیر فوادچوہدری کا کہنا ہے کہ سمبڑیال الیکشن سب کے سامنے ہے، پی ٹی آئی کی مقبولیت کم نہیں ہوئی،سیاست میں اتار چڑھاو آتا رہتا ہے،ووٹ صرف بانی پی ٹی آئی عمران خان کا ہے،190ملین پاونڈ کیس میں سزا معطلی ہوتے نظر نہیں آرہی،دنیا نیوز کے پروگرام میں گفتگو کرتے ہوئے سابق وفاقی وزیر نے کہا کہ بانی پی ٹی آئی کے ساتھ تین ملاقاتیں کر چکا ہوں۔

بانی پی ٹی آئی سے کہا ہمیں اپوزیشن کا الائنس بنانا چاہئے۔اپوزیشن الائنس نہ بننے کی وجہ تحریک انصاف کی ناتجربہ کاری تھی، بانی نے آئندہ کا لائحہ عمل بارے شبلی فراز کو بتایا ہے۔انہوں نے کہا کہ ملک کو استحکام کی طرف جانا چاہئے۔ سینیٹر اعجاز چودھری کے پروڈکشن آرڈرجاری ہوئے مگرتقریر کی اجازت نہیں دے رہے۔

(جاری ہے)

سابق وفاقی وزیر فواد چوہدری کا گفتگو کے دوران مزید کہنا تھا کہ پی ٹی آئی کی جتنی لیڈرشپ تھی انہیں تو کھڈے لائن لگا دیا گیا۔

واضح رہے کہ گزشتہ روزسابق وفاقی وزیر فواد چوہدری کے بیرون ملک جانے پر پابندی ختم ہوگئی تھی۔ ڈائریکٹوریٹ جنرل امیگریشن نے اسلام آباد ہائیکورٹ کو نام پاسپورٹ کنٹرول لسٹ سے نکالنے کے متعلق آگاہ کر دیاتھا۔اسلام آباد ہائی کورٹ میں فواد چوہدری کی بیرون ملک جانے کی اجازت سے متعلق درخواست کی سماعت ہوئی تھی۔اسلام آباد ہائی کورٹ کے جسٹس انعام امین منہاس نے فواد چوہدری کا نام سفری پابندی کی فہرست سے نہ نکالنے پر توہین عدالت کیس کی سماعت کی، جہاں فواد چوہدری اپنے وکیل فیصل چوہدری کے ہمراہ عدالت میں پیش ہوئے تھے۔

عدالت عالیہ میں جمع کروائی گئی رپورٹ کے مطابق فواد چوہدری کا نام پاسپورٹ کنٹرول لسٹ سے گزشتہ روز نکال دیا گیاتھا جس کے بعد عدالتی احکامات پر عملدرآمد کی تصدیق ہونے پر جسٹس انعام امین منہاس نے فواد چوہدری کی درخواست نمٹا دی تھی۔فواد چوہدری خود روسٹرم پر آئے اور جسٹس انعام امین سے مکالمہ کرتے ہوئے کہا کہ عدالت کا بہت بہت شکریہ۔ آپ تو جانتے ہیں ہم نے کہیں نہیں جانا۔ یہیں اپوزیشن کرنی ہے، جسٹس انعام امین منہاس نے درخواست نمٹاتے ہوئے کہا تھاآپ نے پیچھے پڑ کر نام نکلوایا۔ ان ریمارکس پر کمرہ عدالت میں زور کا قہقہہ پڑا تھا۔