صحت کے مسائل سے بچنے کے لیے عید الاضحیٰ کے موقع پر گوشت کا اعتدال پسند استعمال ضروری ہے، ماہرین صحت

اسلام آباد (اُردو پوائنٹ اخبارتازہ ترین - اے پی پی۔ 06 جون2025ء) عیدالاضحیٰ قربانیوں، شکرگزاری اور اشتراک کا ایک پرمسرت موقع ہے،ملک بھر میں خاندان نہ صرف مختلف قسم کے لذیذ پکوان تیار کرتے ہیں بلکہ رشتہ داروں اور دوستوں کے ساتھ باربی کیو پارٹیوں کی میزبانی بھی کرتے ہیں۔اس دوران گوشت کی کھپت میں نمایاں اضافہ ہو جاتا ہے جبکہ بعض اوقات احتیاطی تدابیر پر عمل نہ کرنے کی صورت میں صحت کی پیچیدگیوں کا باعث بن سکتا ہے۔

ماہرین نے صحت کے مسائل سے بچنے کے لیے عید کے دوران اعتدال پسندی اور دھیان سے کھانے کا مشورہ دیا ہے۔جمعہ کو اے پی پی سے گفتگو کرتے ہوئے کنسلٹنٹ نیوٹریشنسٹ ڈاکٹر عروج اعجاز نے عوام کو ہدایت کی کہ قربانی کے بعد گوشت کی پروسیسنگ سے پہلے کم از کم 30 منٹ انتظار کرنا چاہیے۔

(جاری ہے)

اس سے ذبح کئے گئے جانور کا خون مناسب طریقے سے نکلتا ہے جس سے گوشت کے معیار اور حفاظت دونوں میں اضافہ ہوتا ہے۔

ڈاکٹر عروج نے خون، گندگی اور ملبے کو دور کرنے کے لیے گوشت کو پینے کے پانی سے صاف کرنے کی اہمیت پر بھی زور دیا۔انہوں نے کہا کہ گوشت کو زیادہ دیر تک پانی میں رکھنے سے بیکٹیریا کی افزائش کو فروغ مل سکتا ہے۔ سرخ گوشت پروٹین، آئرن، زنک اور بی وٹامنز کا ایک قیمتی ذریعہ ہے لیکن کم وقت میں ضرورت سے زیادہ استعمال جسم کو مغلوب کر سکتا ہے۔

انہوں نے خبردار کیا کہ چربی کولیسٹرول کی سطح اور دل کی بیماری کا خطرہ بڑھا سکتی ہے۔ ڈاکٹر عروج نے مزید متنبہ کیا کہ گوشت کا زیادہ استعمال ہاضمے کو سست کر سکتا ہے جس سے اپھارہ، قبض اور بدہضمی ہو سکتی ہے۔ انہوں نے بہتر ہاضمہ کے لیے 8 سے 10 گلاس پانی پینے کا مشورہ بھی دیا۔انہوں نے مزید کہا کہ یہ مسائل اکثر اس وقت بڑھ جاتے ہیں جب کھانے میں سبزیوں، پھلوں اور سالم اناج سے حاصل مناسب فائبر کی کمی ہوتی ہے۔

انہوں نے اس بات پر بھی روشنی ڈالی کہ زیادہ پروٹین کا بوجھ جگر اور گردوں پر اضافی دباؤ ڈالتا ہے ۔ انہوں نے کہا کہ بہت سے مریض عید کے دوران اپنی غذائی پابندیوں کو بھول جاتے ہیں۔ انہوں نے مزید کہا کہ سرخ گوشت کا زیادہ استعمال صحت کے مسائل پیدا کر سکتا ہے جس کا نتیجہ ہسپتال میں داخلہ ہو سکتا ہے۔عید کے تہوار کے ماحول اور اس حقیقت کے باوجود کہ بکرا عید کے دوران گوشت کی کھپت معمول سے زیادہ ہوتی ہے اس لئے لوگوں کا ہوشیار رہنا ضروری ہے۔