گورنر فیصل کریم کنڈی کا یوم شہداء پولیس کے موقع پر پشاور پولیس لائن کا دورہ

پیر 4 اگست 2025 23:02

پشاور (اُردو پوائنٹ اخبارتازہ ترین - اے پی پی۔ 04 اگست2025ء) گورنر خیبرپختونخوا فیصل کریم کنڈی نے پیر کو یوم شہداء پولیس کے موقع پر پشاور پولیس لائن کا دورہ کیا اور شہدائے پولیس کی یادگار پر حاضری دی۔ پولیس لائن پشاور پہنچنے پر سی سی پی او پشاور قاسم علی خان، ایس ایس پی آپریشن مسعود خان بنگش اور دیگر نے انہیں خوش آمدید کہا۔گورنرنے شہدائے پولیس کی یادگار پر پھولوں کی چادر چڑھائی اور شہداء کے درجات کی بلندی کے لیئے دعا بھی کی۔

یادگار شہداء پر پولیس کے چاک وچوبنددستہ نے گورنر کو سلامی پیش کی۔

(جاری ہے)

اس موقع پر گفتگو کرتے ہوئے گورنرنے خیبر پختونخوا سمیت ملک بھر کے شہدائے پولیس کو خراجِ عقیدت پیش کیا اور شہداء پولیس کے اہل خانہ سے بھی یکجہتی کا اظہارکیا۔ انہوں نے کہاکہ شہداء پولیس کے ورثاء کو کبھی تنہا نہیں چھوڑیں گے، پولیس اہلکاروں نے جانوں کا نذرانہ دے کر قوم کا سر فخر سے بلند کیا،بھارتی حمایت یافتہ دہشت گردوں کا خیبر پختونخوا پولیس بہادری سے مقابلہ کر رہی ہے، فیصل کریم کنڈی نے کہاکہ خیبرپختونخوا پولیس نے جوانمردی سے دہشت گردوں کے حملوں کو ناکام بنایا، پولیس فورس کا عزم پوری قوم کے حوصلے کی علامت ہے۔