پولیس ہیڈکوارٹر حیدرآباد میں نمازِ عید کی ادائیگی، ملکی سلامتی کے لیے خصوصی دعا

ہفتہ 7 جون 2025 14:00

حیدرآباد (اُردو پوائنٹ اخبارتازہ ترین - اے پی پی۔ 07 جون2025ء) ڈپٹی انسپکٹر جنرل (ڈی آئی جی) پولیس حیدرآباد رینج طارق رزاق دھاریجو، ڈویژنل کمشنر حیدرآباد بلال احمد میمن اور سینئر سپرنٹنڈنٹ پولیس (ایس ایس پی) حیدرآباد عدیل حسین چانڈیو نے پولیس ہیڈکوارٹر حیدرآباد میں نمازِ عید ادا کی۔ اس موقع پر پولیس افسران اور جوانوں کی بڑی تعداد بھی موجود تھی۔

نمازِ عید کے بعد ملک کی ترقی، خوشحالی اور سلامتی کے لیے خصوصی دعا کی گئی۔

(جاری ہے)

دعا کے دوران ملکی یکجہتی، عوامی فلاح و بہبود اور امن و امان کی فضا کے قیام کے لیے اللہ تعالیٰ کے حضور گڑگڑا کر دعائیں مانگی گئیں۔ نماز کے اختتام پر ڈی آئی جی حیدرآباد، کمشنر حیدرآباد اور ایس ایس پی حیدرآباد نے پولیس افسران اور جوانوں سے فرداً فرداً ملاقات کی اور انہیں عید کی مبارکباد دی۔ اس موقع پر افسران نے فورس کی خدمات کو سراہتے ہوئے ان کے جذبے کو خراج تحسین پیش کیا۔ پولیس ہیڈکوارٹر میں عید کے اس پرمسرت موقع پر خوشگوار اور پرامن ماحول دیکھنے میں آیا، جہاں افسران اور جوانوں نے روایتی جذبے اور بھائی چارے کے ساتھ ایک دوسرے کو عید کی خوشیوں میں شریک کیا۔