عید الاضحیٰ کے دوسرے روز بھی راولپنڈی کنٹونمنٹ بورڈ کی جانب سے صفائی آپریشن بھرپور انداز میں جاری رہا

اتوار 8 جون 2025 22:00

راولپنڈی (اُردو پوائنٹ اخبارتازہ ترین - اے پی پی۔ 08 جون2025ء) عید الاضحیٰ کے دوسرے روز بھی راولپنڈی کنٹونمنٹ بورڈ کی جانب سے صفائی آپریشن بھرپور انداز میں جاری رہا۔ کنٹونمنٹ بورڈ کے عملے نے شدید گرمی کے باوجود اپنی ذمہ داریوں کو احسن طریقے سے نبھاتے ہوئے قربانی کے جانوروں کی آلائشوں کو تلف کرنے کا عمل جاری رکھا۔ ترجمان کنٹونمنٹ بورڈ کے مطابق اب تک 1063 سے زائد آلائشیں ٹرانسفر اسٹیشن سے ڈمپنگ پوائنٹس پر پہنچا کر محفوظ طریقے سے تلف کی جا چکی ہیں۔

صفائی آپریشن کے دوران کنٹرول روم کو موصول ہونے والی 280 شکایات کا فوری ازالہ کیا گیا جس سے عوامی شکایات کے بروقت حل کا عملی مظاہرہ سامنے آیا۔ ایڈیشنل سی ای او ارشد خان اور ڈپٹی سی ای او ناصر کمال نے مختلف علاقوں کا دورہ کر کے صفائی آپریشن کا جائزہ لیا اور موقع پر موجود عملے کی حوصلہ افزائی کی۔

(جاری ہے)

ایڈیشنل سی ای او ارشد خان نے کہا کہ سخت موسم میں دن رات محنت کرنے والے سینٹری ورکرز شاباش کے مستحق ہیں جنہوں نے صاف ستھرا ماحول فراہم کرنے میں کلیدی کردار ادا کیا۔

ارشد خان نے بتایا کہ 700 سے زائد افراد پر مشتمل عملہ فیلڈ میں موجود ہے جبکہ 110 چھوٹی بڑی گاڑیوں کے ذریعے آلائشوں کو اٹھا کر مقررہ مقامات تک پہنچایا جا رہا ہے۔ ڈپٹی سی ای او ناصر کمال کے مطابق وارڈ نمبر 1 سے وارڈ نمبر 10 تک قربان گاہوں اور مرکزی شاہراہوں کو فنائل سے دھو کر مکمل طور پر کلیئر کر دیا گیا ہے۔ انہوں نے کہا کہ تمام ڈیوٹی پر موجود اہلکاروں کو معیاری کھانے کی فراہمی یقینی بنائی جا رہی ہے تاکہ وہ بہتر انداز میں خدمات انجام دے سکیں۔ عوامی اطمینان کو یقینی بنانے کے لیے راولپنڈی کنٹونمنٹ بورڈ کے مرکزی کنٹرول روم کے ذریعے صفائی آپریشن کی مسلسل نگرانی جاری ہے اور یہ صفائی مہم کل بھی مکمل جوش و جذبے سے جاری رہے گی۔