ح*کولمبیا میں صدارتی امیدوار کو حامیوں کے سامنے سر میں گولی مار دی گئی

ھ*سینیٹر یوریب عوامی پارک میں انتخابی مہم کے سلسلے میں موجود تھے،ایک مشتبہ شخص گرفتار

پیر 9 جون 2025 17:00

ق*بگوٹا(اُردو پوائنٹ اخبارتازہ ترین - آن لائن۔ 09 جون2025ء)کولمبیا میں اپوزیشن کے سرکردہ رہنما اور 2026 کے صدارتی امیدوار سینیٹر میگوئل یوریب پر قاتلانہ حملے میں شدید زخمی ہو گئے۔ حکومتی ذرائع اور میگوئل یوریب کی جماعت نے حملے کی تصدیق کرتے ہوئے بتایا ہے کہ انہیں نازک حالت میں قریبی ہسپتال منتقل کیا گیا ہے۔انتالیس سالہ میگوئل یوریب قدامت پسند اپوزیشن جماعت ڈیموکریٹک سینٹر سے تعلق رکھتے ہیں، جو سابق صدر آلویرو یوریب نے قائم کی تھی۔

اگرچہ دونوں کا تعلق ایک ہی جماعت سے ہے، لیکن ان کے درمیان خاندانی رشتہ نہیں ہے۔پارٹی کے بیان کے مطابق، سینیٹر یوریب ہفتے کے روز بوگوٹا کے فونتیبون علاقے میں ایک عوامی پارک میں انتخابی مہم کے سلسلے میں موجود تھے جب مسلح افراد نے انہیں پشت سے گولی مار دی۔

(جاری ہے)

پارٹی نے حملے کو سنگین قرار دیا ہے تاہم یوریب کی صحت کے بارے میں مزید تفصیلات نہیں بتائیں۔

کولمبیا کے وزیر دفاع پیدرو سانچیز نے بتایا کہ حملے میں ملوث ایک مشتبہ شخص کو گرفتار کر لیا گیا ہے اور یہ بھی تفتیش کی جا رہی ہے کہ آیا اس حملے میں مزید افراد بھی شامل تھے۔ سانچیز نے اسپتال جا کر سینیٹر کی عیادت کی۔کولمبیا کی صدارتی ترجمان کی جانب سے جاری بیان میں اس پرتشدد حملے کی سخت الفاظ میں مذمت کی گئی اور واقعے کی مکمل اور شفاف تحقیقات کا مطالبہ کیا گیا ہے۔