موسمِ حج 1446ھ کے دوران 1.8 کروڑ سے زائد مقامی و بین الاقوامی کالز کا ریکارڈ

جدید ترین ڈیجیٹل انفرا اسٹرکچر اور اے آئی ٹیکنالوجی سے حجاج کو اعلی معیار کی سروسز فراہم کی گئیں

منگل 10 جون 2025 11:59

ریاض (اُردو پوائنٹ اخبارتازہ ترین - این این آئی۔ 10 جون2025ء)سعودی عرب کی مواصلات، خلا و ٹیکنالوجی نے حج 1446ھ کے دوران ٹیلی کمیونی کیشن نیٹ ورکس کی کارکردگی سے متعلق اعداد و شمار جاری کر دیے ہیں، جن کے مطابق مکہ مکرمہ، مدینہ منورہ اور مقدس مقامات پر مقامی و بین الاقوامی کالز کی تعداد 181.2 ملین سے تجاوز کر گئی۔عرب ٹی وی نے بتایاکہ ادارے کے مطابق یکم تا 11 ذوالحجہ کی مدت میں موبائل انٹرنیٹ کی رفتار 297 میگابِٹ فی سیکنڈ تک جا پہنچی، جو گزشتہ سال کے مقابلے میں 32 فیصد زیادہ ہے۔

اسی مدت میں فی کس یومیہ ڈیٹا استعمال 1259 میگابائٹ رہا، جو عالمی اوسط (2.9 گنا)سے کہیں زیادہ ہے۔رپورٹ میں بتایا گیا کہ ان اعلی نتائج کا حصول خادمِ حرمین شریفین کی قیادت کی سرپرستی، حکومتی و نجی اداروں کے باہمی اشتراک اور جامع آپریشنل منصوبہ بندی کا مرہونِ منت ہے۔

(جاری ہے)

سعودی عرب کے جدید ڈیجیٹل انفرا اسٹرکچر نے حجاج کرام کو سہولتیں فراہم کرنے، ان کی صحت، سکیورٹی اور سلامتی یقینی بنانے میں مرکزی کردار ادا کیا۔

مواصلاتی ادارے نے واضح کیا کہ جدید ٹیکنالوجی، خاص طور پر مصنوعی ذہانت (اے آئی) کا استعمال، حج کے دوران ہجوم کی مثر انداز میں نگرانی و انتظام اور سرکاری خدمات کی معیاری فراہمی میں انتہائی مددگار ثابت ہوا۔ ان سروسز کی فراہمی کے لیے سعودی عرب کی ڈیجیٹل کمپنی آرامکو ڈیجیٹل، ہائر کمیٹی برائے صنعتی سکیورٹی، سعودی واٹر اتھارٹی اور سعودی ریلویز کے ساتھ قریبی تعاون کیا گیا۔ہیئت نے مزید بتایا کہ تمام ٹیلی کمیونی کیشن سہولتیں بہترین معیار کے ساتھ مہیا کی گئیں، تاکہ ضیوف الرحمان کو حج کی ادائیگی کے دوران ایک محفوظ، مربوط اور جدید ٹیکنالوجی سے مزین تجربہ حاصل ہو۔