اسرائیل نے گریٹا تھنبرگ کو ملک بدر کر دیا

اسلام آباد (اُردو پوائنٹ ۔ DW اردو۔ 10 جون 2025ء) اسرائیل کی وزارت خارجہ نے ایکس پر ایک پوسٹ میں لکھا کہ تھنبرگ پرواز کے ذریعے فرانس کے لیے روانہ ہوئیں اور اس کے بعد وہ اپنے آبائی ملک سویڈن روانہ ہو گئیں۔ پیغام کے ساتھ ماحولیاتی کارکن تھنبرگ کی ایک تصویر بھی پوسٹ کی گئی ہے جس میں وہ ہوائی جہاز میں بیٹھی ہوئی ہیں۔

اسرائیل نے غزہ پٹی کے لیے امداد لے جانے والی کشتی روک لی

فریڈم فلوٹیلا پر ڈرون حملہ، بحری جہاز کے ڈوب جانے کا خطرہ

تھنبرگ غزہکے لیے امداد لے جانے والے کشتی میڈلین کے 12 مسافروں میں سے ایک تھیں۔

(جاری ہے)

اسرائیلی بحری افواج نے غزہ کے ساحل سے تقریباﹰ 200 کلومیٹر کے فاصلے پر پیر نو جون کی صبح اس کشتی کو قبضے میں لے لیا تھا۔ فریڈم فلوٹیلا کولیشن اور انسانی حقوق کے گروپوں نے اسرائیلی اقدامات کو بین الاقوامی قوانین کی خلاف ورزی قرار دیا ہے۔

دیگر کارکنوں کو بھی ملک بدری کا سامنا

فریڈم فلوٹیلا کے ساتھ سفر کرنے والے 12 کارکنوں کو حراست میں لے کر اسرائیل لے جایا گیا، جہاں ان کارکنوں کو انسانی حقوق کا ایک اسرائیلی گروپ ادالہ قانونی مدد فراہم کر رہا ہے۔

اسرائیل کی وزارت داخلہ کی ترجمان سبین حداد کے مطابق جن کارکنوں کو منگل کے روز ملک بدر کیا جا رہا تھا، وہ جج کے سامنے پیش ہونے کے اپنے حق سے دستبردار ہو گئے تھے۔

فریڈم فلوٹیلا کولیشن کی میڈیلین نامی کشتی پر یورپی پارلیمنٹ کی فلسطینی نژاد فرانسیسی رکن ریما حسن بھی موجود تھیں۔ اس سے قبل فلسطینیوں کے بارے میں اسرائیلی پالیسیوں کی مخالفت کی وجہ سے انہیں اسرائیل میں داخلے سے روک دیا گیا تھا۔

فرانسیسی وزیر خارجہ ژاں نوئل بارو نے کہا ہے کہ حراست میں لیے گئے فرانسیسی کارکنوں میں سے ایک نے اپنی ملک بدری کے حکم نامے پر دستخط کیے اور وہ آج منگل کو ہی اسرائیل سے فرانس کے لیے روانہ ہو جائیں گے، باقی پانچ نے انکار کر دیا۔ انہوں نے کہا کہ تمام کارکنوں سے قونصلر نے ملاقاتیں کی ہیں۔

ملک بدر کیے جانے والے ہسپانوی کارکن سرجیو توریبیو نے بارسلونا پہنچنے کے بعد اسرائیل کے اقدامات کی مذمت کی: ''یہ ناقابل معافی ہے، یہ ہمارے حقوق کی خلاف ورزی ہے۔ یہ بین الاقوامی پانیوں میں قزاقوں کا حملہ ہے۔‘‘

بین الاقوامی قانون کی خلاف ورزی پر سوالات

پیر کے روز انسانی حقوق کی اسرائیلی تنظیم ادالہ نے کہا تھا کہ اسرائیل کے پاس اس کشتی کو تحویل میں لینے کا کوئی قانونی اختیار نہیں تھا، کیونکہ یہ بین الاقوامی پانیوں میں تھی اور یہ کہ یہ کشتی اسرائیل کی طرف نہیں بلکہ فلسطینی علاقائی پانیوں کی طرف جا رہی تھی۔

دوسری طرف انسانی حقوق کی بین الاقوامی تنظیم ایمنسٹی انٹرنیشنل کا کہنا ہے کہ اسرائیل ''بحری حملے‘‘ کے ذریعے بین الاقوامی قوانین کی خلاف ورزی کر رہا ہے اور اسرائیل سے مطالبہ کیا کہ وہ ان کارکنوں کو فوری اور غیر مشروط طور پر رہا کرے۔

اسرائیل کا کہنا ہے کہ اس کے اقدامات بین الاقوامی قوانین کے مطابق ہیں۔ اسرائیل نے اس کشتی کے سفر کو ایک 'پبلسٹی اسٹنٹ‘ قرار دیتے ہوئے اسے 'سیلفی کشتی‘ قرار دیا۔ اسرائیلی حکام کا کہنا ہے کہ فلوٹیلا بہت ہی معمولی امداد لے کر آ رہا تھا، جس پر ایک ٹرک لوڈ سے بھی کم امدادی سامان موجود تھا۔

اے پی، روئٹرز کے ساتھ

ادارت: امتیاز احمد، مقبول ملک