انڈیا کا مسافر طیارہ گرنے پر یو این چیف کا گہرے رنج و غم کا اظہار

یو این جمعہ 13 جون 2025 00:15

اسلام آباد (اُردو پوائنٹ ۔ UN اردو۔ 13 جون 2025ء) اقوام متحدہ کے سیکرٹری جنرل انتونیو گوتیرش نے ایئرانڈیا کے جہاز کو پیش آنے والے حادثے پر گہرے افسوس کا اظہار کیا ہے۔ لندن کی جانب اڑان بھرنے والا یہ مسافر بردار طیارہ آج انڈیا کے شہر احمد آباد میں گر کر تباہ ہو گیا جس پر عملے کے ارکان سمیت 242 مسافر سوار تھے۔

سیکرٹری جنرل نے حادثے کی خبر کو ہولناک قرار دیتے ہوئے اس میں ہلاک ہونے والوں کے عزیزوں سے دلی تعزیت کا اظہار کیا ہے۔

انڈیا میں اقوام متحدہ کے دفتر نے بھی اس المناک حادثے پر افسوس کا اظہار کرتے ہوئے متاثرہ خاندانوں سے ہمدردی اور انڈیا کی حکومت اور عوام سے یکجہتی کا پیغام جاری کیا ہے۔

بوئنگ ڈریم کمپنی کا تیار کردہ یہ جہاز انڈیا کے معیاری وقت کے مطابق جمعرات دوپہر ایک بج کر 38 منٹ پر احمد آباد کے ہوائی اڈے سے روانہ ہوا جس نے لندن کے گیٹوک ایئرپورٹ پر اترنا تھا۔

(جاری ہے)

اس پرواز میں 169 مسافروں کا تعلق انڈیا، 53 کا برطانیہ، سات کا پرتگال اور ایک کا تعلق کینیڈا سے تھا۔

پرواز سے کچھ دیر کے بعد یہ جہاز ایک میڈیکل کالج کے کیمپس کی عمارت پر گر گیا۔ حادثے میں جہاز کے مسافروں سمیت بڑی تعداد میں کالج کے طلبہ اور اساتذہ کے زخمی و ہلاک ہونے کا خدشہ بھی ظاہر کیا گیا ہے۔

اس حادثے کی ویڈیو اور تصاویر میں اس جہاز کو نیچی پرواز کرتے دیکھا جا سکتا ہے جس کے بعد وہ عمارتوں کے عقب میں غائب ہو جاتا ہے جہاں سے آگ اور دھوئیں کے مرغولے اٹھتے دکھائی دیتے ہیں۔ حادثے میں متعدد عمارتوں کو نقصان پہنچا جبکہ طیارے کا عقبی حصہ ایک عمارت میں دھنسا دکھائی دیتا ہے۔

جائے حادثہ پر لوگوں کی تلاش اور ان کی زندگی بچانے کے لیے کارروائیاں جاری ہیں۔