پاکستان کی تاریخ میں اتنی عزت کسی شخص کو نہیں ملی جتنی فیلڈ مارشل عاصم منیر کو ملی

لاہور ( اردوپوائنٹ اخبار تازہ ترین۔ آئی پی اے ۔ 12 جون 2025ء ) سینئر صحافی، تجزیہ کار ستارہ امتیاز سلمان غنی نے کہا ہے کہ پاکستان کی تاریخ میں اتنی عزت کسی شخص کو نہیں ملی جتنی فیلڈ مارشل عاصم منیر کو ملی، عمران خان کی رہائی کا فی الحال کوئی امکان نہیں، جب تک پی ٹی آئی کا سیاسی طرز عمل درست نہیں ہوگا، میرا نہیں خیال کہ کوئی ریلیف ملے گا۔ Invalid url سینئر صحافی سلمان غنی نے اردوپوائنٹ ڈیجیٹل کے پروگرام میں اینکر، ایڈیٹر رپورٹنگ محمد ثناء اللہ ناگرہ کے ساتھ خصوصی گفتگو کرتے ہوئے کہا کہ مودی نے بھارت کو بارود کے ڈھیر پر لاکھڑا کیا ہے، آپ ان کے پروفائل دیکھیں یہ سب کریمنل ہیں، میں وہ صحافی ہوں جو مودی کے بارے میں ایک رائے رکھتا ہوں، مودی ایک شخصیت نہیں بلکہ ایک فاشسٹ کیفیت ذہنیت ہے، مودی جب سے برسراقتدار آیا ہے یہ پاکستان کو مٹانے اور پاکستان پر چڑھ دوڑنے کی بات کرتا ہے۔

(جاری ہے)

پاکستان ایک نظریے کی بنیاد پر وجود میں آیا ہے، جب سقوط مشرقی پاکستان ہوا تو اندرا گاندھی نے کہا تھا کہ ہم نے نظریہ پاکستان کو بحیرہ عرب میں ڈبو دیا ہے، لیکن آپ آج بھی بنگلا دیش میں جاکر دیکھیں اسی طرح قائداعظم کی برسی منائی جارہی ہے اور پاکستان کے پرچم بھی نظر آرہے ہیں۔ انہوں نے کہا کہ پہلگام واقعے پر مودی نے جس طرح پاکستان پر الزام تراشی کی ہے، دنیا کے کسی ملک نے اس کی تعریف نہیں کی، میں سمجھتا ہوں کہ 22 اپریل سے 10مئی کا دورانیہ پاکستان کی سیاسی تاریخ کا ایک آئیڈیل دور ہے، پاکستان میں اسلام آباد اور پنڈی کے درمیان کسی ایک معاملے پر بھی اختلاف نہیں تھا، دنیا بھر میں پاکستان کا ایک ذمہ درانہ طرز عمل سامنے آیا۔

پاکستان نے بھارت کو کہا پہلگام واقعے کی تحقیقات کروالیں، لیکن وہ اس طرف نہیں آیا۔ مذاکرات کی بات وہ کرتا ہے جس کا کوئی سیاسی کیس ہوتا ہے، پاکستان کا ایک سیاسی کیس ہے، جبکہ بھارت مذاکرات کی طرف کبھی نہیں آئے گا۔ کشمیر پر بات آگے بڑھے بغیر خطے میں امن نہیں آنا۔ یہ سی پیک اور آئی ایم ایف کی لڑائی ہے، چین پاکستان کے ساتھ 100 فیصد مخلص ہے، مودی فاشسٹ ہے، لکھ لیں اپنی ٹرم پوری نہیں کرے گا، مودی اب فضائی حرکت نہیں بلکہ آزاد کشمیر میں کوئی حماقت کرسکتا ہے۔

سینئر صحافی سلمان غنی نے کہا کہ پاکستان کی تاریخ میں اتنی عزت کسی شخص کو نہیں ملی جتنی فیلڈ مارشل عاصم منیر کو ملی۔ انہوں نے کہا کہ جب تک پی ٹی آئی کا سیاسی طرز عمل درست نہیں ہوگا، کوئی ریلیف نہیں ملے گا،عمران خان کی رہائی کا فی الحال کوئی امکان نہیں، چور دروازے سے بات نہیں بنے گی۔