} فیصل آباد،سیکرٹری لائیوسٹاک پنجاب ثاقب علی کی خصوصی ہدایات

u محکمہ لائیوسٹاک اینڈ ڈیری ڈویلپمنٹ (L&DD) ڈویژن فیصل آباد کی جانب سے وزیراعلیٰ پنجاب لائیوسٹاک کارڈ سکیم کے دوسرے مرحلے میں پنجاب بھر کی طرح ڈویژن فیصل آباد میں بھی رجسٹریشن کا عمل جاری

منگل 10 جون 2025 19:50

P فیصل آباد (اُردو پوائنٹ اخبارتازہ ترین - آن لائن۔ 10 جون2025ء)سیکرٹری لائیوسٹاک پنجاب ثاقب علی عطیل کی خصوصی ہدایات پر محکمہ لائیوسٹاک اینڈ ڈیری ڈویلپمنٹ (L&DD) ڈویژن فیصل آباد کی جانب سے وزیراعلیٰ پنجاب لائیوسٹاک کارڈ سکیم کے دوسرے مرحلے میں پنجاب بھر کی طرح ڈویژن فیصل آباد میں بھی رجسٹریشن کا عمل جاری ہے۔ اس مرحلے میں پانچ سے بیس مویشی رکھنے والے کسانوں کو ایک لاکھ پینتیس ہزار روپے سے لے کر پانچ لاکھ چالیس ہزار روپے تک کے بلا سود قرضے دیے جا رہے ہیں، جنہیں چھ ماہ کے استعمال کے بعد ساتویں ماہ واپس کرنا ہوگا۔

اس بار کسانوں کو قرض کا30 فیصد حصہ نقد نکلوانے کی سہولت بھی حاصل ہوگی جبکہ رجسٹرڈ ڈیلرز سے ونڈا ، سائلیج اور منرل مکسچر کی خریداری کی اجازت بھی دی گئی ہے۔

(جاری ہے)

درخواست گزار کے لئے پنجاب کا رہائشی ہونا، محکمہ لائیوسٹاک کے 9211 سسٹم پر رجسٹرڈ ہونا ، درست شناختی کارڈ، فعال موبائل سم، نادرا و نیکٹا سے تصدیق شدہ شناخت اور الیکٹرانک کریڈٹ انفارمیشن بیورو سے کلین کریڈٹ ہسٹری ہونا لازمی ہے ۔

درخواست دینے کے لئے امیدوار اپنے رجسٹرڈ موبائل نمبر سی''PLC''اسپیس کے بعد اپنا شناختی کارڈ نمبر لکھ کر8070 پر ایس ایم ایس کریں۔ شفافیت کو یقینی بنانے کے لیے درخواست دہندگان کا انتخاب ''پہلے آئیں، پہلے پائیں'' کی بنیاد پر کیا جائے گا اور کسانوں اور اُن کے جانوروں کی تصدیق اربن یونٹ کے ذریعے کی جائے گی۔اس بارے میں ڈائریکٹر لائیوسٹاک ڈاکٹر سید ندیم بدر کا کہنا ہے کہ وہ لائیوسٹاک کارڈ ہولڈرز جنہوں نے پہلے مرحلے کی ادائیگی مکمل کر لی ہے انہیں دوسرے مرحلے میں ترجیح دی جائے گی۔ اُنہوں نے اس سکیم کو کسانوں کی معاشی خودمختاری،بہتر مویشی نگہداشت اور دیہی معیشت کی بحالی کی جانب ایک انقلابی قدم قرار دیا ہے۔