Live Updates

وفاقی بجٹ برائے مالی سال 2025-26، تعلیم اور صحت کے شعبوں کیلئے بجٹ میں قابل ذکر اضافہ نہ کیا گیا

آئندہ مالی سال کے دوران وفاقی حکومت کا صحت اور تعلیم کے شعبوں کیلئے صرف 14 اور 18 ارب روپے مختص کرنے کا فیصلہ

محمد علی بدھ 11 جون 2025 00:19

اسلام آباد (اُردو پوائنٹ اخبارتازہ ترین۔ 10 جون2025ء) وفاقی بجٹ برائے مالی سال 2025-26، تعلیم اور صحت کے شعبوں کیلئے بجٹ میں قابل ذکر اضافہ نہ کیا گیا، آئندہ مالی سال کے دوران وفاقی حکومت کا صحت اور تعلیم کے شعبوں کیلئے صرف 14 اور 18 ارب روپے مختص کرنے کا فیصلہ۔ تفصیلات کے مطابق وفاقی وزیر خزانہ محمد اورنگزیب نے قومی اسمبلی میں بجٹ 26-2025 کرتے ہوئے بتایا کہ آئندہ مالی سال میں صحت کے شعبے کے لیے 14.3 ارب روپے کی رقم مختص کی گئی ہے جس سے جاری 21 منصوبوں پر کام مکمل کیا جائے گا۔

انہوں نے بتایا کہ مذکورہ بجٹ کا مقصد صحت کے شعبے میں بنیادی ڈھانچے کو بہتر بنانا، حفاظتی اقدامات کو فروغ دینا اور معیاری طبی سہولیات کی فراہمی کو یقینی بنانا ہے۔ بجٹ دستاویزات کے مطابق تدریسی سہولیات اور ہسپتال،ٹیچنگ ہسپتالوں اور ٹرشری کیئر سہولیات کے لیے 14 ارب روپے سے زائد فنڈز فراہم کیے گئے۔

(جاری ہے)

مذکورہ فنڈز سے صحت کی سہولیات یعنی ہسپتالوں اور طبی مراکز کو جدید طبی آلات کی فراہمی کو یقینی بنایا جائے گا،مجوزہ فنڈز سے وفاقی دارالحکومت اسلام آباد میں ایک نیا کینسر ہسپتال بھی قائم کیا جائے گا،اسی طرح صحت کی دیکھ بھال کی سہولیات کو اپ گریڈ کیا جائے گا تاکہ عوام کو بہتر طبی خدمات فراہم کی جا سکیں۔

انہوں نے کہاکہ صحت کے لیے مختص کیے جانے والے فنڈز سے ملک بھر میں ہیپاٹائٹس سی اور شوگر کی اسکریننگ اور علاج پر بھی اخراجات کیے جائیں گے۔ جبکہ حکومت نے آئندہ مالی سال کیلئے تعلیم کیلیے 18.5 ارب روپے مختص کرنے کا فیصلہ کیا ہے۔