سرگودہا، نیو سٹیلائٹ ٹاون میں پانی کی فراہمی بحال کر دی گئی

بدھ 11 جون 2025 17:15

سرگودہا (اُردو پوائنٹ اخبارتازہ ترین - اے پی پی۔ 11 جون2025ء) کمشنر سرگودہا ڈویژن جہانزیب اعوان کے نوٹس پر نیو سٹیلائٹ ٹاون واٹر سپلائی کے پائپ کو تبدیل کرکے علاقے میں پینے کے پانی کی فراہمی کو بحال کر دیا گیا ہے۔ اہل علاقہ کا کمشنر سرگودہا سے اظہار تشکر،تفصیلات کے مطابق کمشنر جہانزیب اعوان نے گزشتہ روز سوشل میڈیا پر نیو سیٹلائٹ ٹاؤن میں پینے کے پانی کی شدید قلت سے متعلق وائرل ہونے والی شکایات کا فوری نوٹس لیتے ہوئے متعلقہ حکام کو فوری اور مؤثر اقدامات کی ہدایت کی۔

شہریوں کی جانب سے سوشل میڈیا پر پوسٹ میں نشاندہی کی گئی کہ علاقے میں کئی دنوں سے پانی کی فراہمی معطل ہے جبکہ واٹر سپلائی نظام کی ناقص کارکردگی اور ٹھیکیدار عملے کی غفلت صورتحال کو مزید خراب کر رہی ہے۔

(جاری ہے)

نہر بندی کے باعث پانی کی فراہمی مکمل طور پر بند ہو چکی ہے، جس کے نتیجے میں تقریباً ڈیڑھ لاکھ کی آبادی شدید مشکلات کا شکار ہے۔شہریوں نے مطالبہ کیا ہے کہ واٹر سپلائی کا نظام ٹھیکیدار سے واپس لے کر میونسپل کارپوریشن کے حوالے کیا جائے تاکہ بہتری لائی جا سکے۔

اس عوامی شکایت کا فوری نوٹس لیتے ہوئے کمشنر سرگودھا جہانزیب اعوان نے سی او میونسپل کارپوریشن و دیگر متعلقہ افسران کو ہدایت کی کہ پانی کی فراہمی بحال کرنے کے لیے ہنگامی بنیادوں پر اقدامات کیے جائیں۔ جس پر کاروائی کرتے ہوئے 24 گھنٹے میں اہل علاقہ کی شکایت کا ازالہ کر دیا گیا ہے۔