مظفرگڑھ ،ڈی پی او آفس آنے والے سائلین کو ترجیحی بنیادوں پر سنا جائے اور ان کے مسائل حل کئے جائیں،آر پی او

مظفرگڑھ (اُردو پوائنٹ اخبارتازہ ترین - اے پی پی۔ 12 جون2025ء) وزیر اعلیٰ پنجاب مریم نواز شریف کے ویژن کے مطابق سروس ڈیلیوری کے معیار کوبہتر بنانے، عوامی شکایات کےبروقت ازالہ اورکارکردگی کے جائزہ کے حوالے سے ریجنل پولیس آفیسر ڈیرہ غازی خان کیپٹن (ر) سجاد حسن خان کا ضلع مظفر گڑھ کا دورہ کیا، پولیس ترجمان کے مطابق ریجنل پولیس آفیسر ڈیرہ غازی خان کیپٹن (ر) سجاد حسن خان نے ضلع مظفر گڑھ کا خصوصی دورہ کیا۔

ڈسٹرکٹ پولیس آفس پہنچنے پر ڈی پی او مظفرگڑھ ڈاکٹر رضوان احمد خان نے پرتپاک استقبال کیا۔ ڈی پی او آفس کی مختلف برانچز کا تفصیلی جائزہ لے کر ریکارڈ کی بروقت تکمیل، شفافیت اور درستگی کو چیک کیا۔ آر پی او نے سیف سٹی اتھارٹی مظفرگڑھ کا وزٹ کر کے سیف سٹی کی ورکنگ اور مانیٹرنگ کے طریقہ کار کا جائزہ لیا۔

(جاری ہے)

آر پی او نے ڈی پی او آفس میں نو تعمیر شدہ سمارٹ خدمت مرکز اور نو تزئین شدہ ڈسٹرکٹ کمپلینٹ سیل کا خصوصی افتتاح کرکے بہترین ماحول میں شہریوں کو سروسز کی فراہمی کو سراہا۔

آر پی او نے افسران کو ہدایت کی کہ اعلیٰ حکام کی جانب سے موصول ہونے والے احکامات پر فوری اور موثر عملدرآمد کو ہر صورت یقینی بنایا جائے انہوں نے کہا کہ ڈی پی او آفس ضلع کی سطح پر پولیس کا عوامی چہرہ ہوتا ہے، لہٰذا یہاں آنے والے سائلین کے مسائل کو ترجيحی بنیادوں پر سنا جائے اور ان کے فوری حل کو ممکن بنایا جائے۔ آر پی او نے سپیشل انیشیٹو پولیس اسٹیشن سٹی اور صدر مظفرگڑھ کے سر پرائز وزٹ کرکے تھانہ جات کے آن لائن و مینول ریکارڈ کی تکمیل ، فرنٹ ڈیسک، حوالات، بیرکس، مال خانہ ،اسلحہ خانہ، مقدمات کی تفتیش، سیکیورٹی اقدامات، ملازمان کی رہائش اور عمارت کا تفصیلی معائنہ کیا۔

حوالات کا معائنہ کے دوران آر پی او نے حوالات میں بند ملزمان سے بھی گفتگو کی۔ وزٹ کے دوران آر پی او نے محرام الحرام کی آمد کے پیش نظر امن کمیٹی ممبران، انجمن تاجران اور وکلاء نمائندگان سے خصوصی ملاقات کی۔ آر پی او نے فرقہ وارانہ ہم آہنگی، بین المذاہب رواداری، انتہا پسندی کے خاتمے اور علاقے میں امن و امان کے قیام کے لیے امن کمیٹی کے کردار کو سراہا۔ انجمن تاجران سے گفتگو کے دوران آر پی او نے کاروباری برادری کو مسائل کےحل میں مکمل تعاون کی یقین دہانی کرائی۔ وکلاء نمائندگان سے گفتگو کے دوران قانون کی بالادستی اور شہریوں کو بروقت اور شفاف انصاف کی فراہمی کے معاملات زیر بحث لائے گئے۔\378