سٹی ہسپتال واقعہ، بے گناہ خاتون کی ہلاکت پر وزیراعلیٰ برہم، ذمہ دار اہلکار گرفتار، اعلیٰ افسران معطل

جمعرات 12 جون 2025 16:56

گلگت (اُردو پوائنٹ اخبارتازہ ترین - اے پی پی۔ 12 جون2025ء) سٹی ہسپتال گلگت میں پولیس اہلکاروں کی مبینہ غفلت کے نتیجے میں ایک بے گناہ خاتون کی ہلاکت پر وزیراعلیٰ گلگت بلتستان حاجی گلبر خان نے سخت نوٹس لیتے ہوئے ذمہ داروں کے خلاف فوری کارروائی کا حکم دیا ہے، واقعہ کے بعد علاقے میں شدید عوامی ردعمل دیکھنے میں آیا۔ وزیراعلیٰ نے واقعے میں ملوث پولیس اہلکاروں کو فوری طور پر حراست میں لینے کی ہدایت کی، جس پر SIT ٹیم نے تمام متعلقہ اہلکاروں کو گرفتار کر کے اُن کے خلاف انسدادِ دہشت گردی ایکٹ (ATA) کے تحت مقدمہ درج کر لیا ہے۔

وزیراعلیٰ نے ایس ایس پی گلگت اور متعلقہ تھانے کے ایس ایچ او کو واقعے میں غفلت برتنے پر معطل کر دیا ہے تاکہ انکوائری کے عمل میں شفافیت کو یقینی بنایا جا سکے۔

(جاری ہے)

انہوں نے ہدایت کی کہ معاملے کی تحقیقات جوائنٹ انویسٹی گیشن ٹیم (JIT) کے تحت کی جائیں، جب کہ ایک علیحدہ انکوائری کمیشن بھی تشکیل دیا جا رہا ہے۔حاجی گلبر خان نے واقعے میں جاں بحق ہونے والی خاتون کے ورثاء کو معاوضہ دینے کا اعلان کرتے ہوئے کہا کہ انسانی جان کا ضیاع ناقابل تلافی ہے اور ریاست اس دکھ کی گھڑی میں متاثرہ خاندان کے ساتھ کھڑی ہے۔

وزیراعلیٰ نے کہا کہ پولیس جیسے حساس ادارے میں اس نوعیت کی غفلت ناقابلِ برداشت ہے، قانون سے بالا کوئی نہیں اور جو بھی اس اندوہناک واقعے میں ملوث پایا گیا، اُسے قانون کے کٹہرے میں لایا جائے گا۔