پی آئی ٹی بی اور انٹرنیشنل سکول لاہور کے درمیان PayZen کے نفاذ کیلئے معاہدہ

جمعرات 12 جون 2025 17:41

لاہور (اُردو پوائنٹ اخبارتازہ ترین - اے پی پی۔ 12 جون2025ء) پنجاب آئی ٹی بورڈ اور انٹرنیشنل سکول لاہور کے درمیان معاہدہ طے پا گیا جس کے تحت پی آئی ٹی بی کے وضع کردہ جدید فِن ٹیک سلوشن PayZen کو سکول کی فیس وصولی کے نظام کو ڈیجیٹل اور موثر بنانے کیلئے نافذ کیا جائے گا۔اس موقع پر انٹرنیشنل سکول لاہور کے پرنسپل شہزاد طاہر، Ad Astra انوویشن (BizLinks پارٹنر) کے نمائندے حسان آغا اور پی آئی ٹی بی کے سینئر پروگرام منیجر عرفان طاہر موجود تھے۔

معاہدے کی رو سے پی آئی ٹی بی نہ صرف ویب پر مبنی PayZen پلیٹ فارم کی تیاری، انضمام اور دیکھ بھال کا ذمہ دار ہوگا بلکہ اس سسٹم کے ذریعے انٹرنیشنل سکول لاہور کو جدید ڈیجیٹل ذرائع جیسے موبائل بینکنگ، اے ٹی ایم اور ڈیبٹ/کریڈٹ کارڈز کے ذریعے فیس وصولی کا موثر نظام مہیا کیا جائے گا۔

(جاری ہے)

مزید برآں سکول انتظامیہ کو ایک جامع ایڈمنسٹریٹو ڈیش بورڈ بھی فراہم کیا جائے گا جو ریئل ٹائم مالیاتی اپ ڈیٹس تک فوری رسائی، شفافیت اور موثر نگرانی کو ممکن بنائے گا۔

اس حوالے سے پی آئی ٹی بی چیئرمین فیصل یوسف کا کہنا تھا کہ PayZen ایک محفوظ اور صارف دوست پلیٹ فارم ہے جو شفافیت، کارکردگی اور ڈویلپمنٹ کو فروغ دیتا ہے۔ اس سسٹم کے ذریعے انٹرنیشنل سکول لاہور اپنی مالیاتی معاملات کو جدید خطوط پر استوار کر سکے گا۔اس سلسلے میں پی آئی ٹی بی سکول کے انتظامی سٹاف کو عملی ٹریننگ بھی فراہم کرے گا اور سسٹم کی مستقل فعالیت اور حفاظت کو یقینی بنانے کیلئے تکنیکی معاونت جاری رکھے گا۔