آئی سی سی آئی نے وفاقی بجٹ 2025-26 کو صنعت مخالف ،آئی پی پیز دوست قرار دیدیا

اسلام آباد(اُردو پوائنٹ اخبارتازہ ترین - این این آئی۔ 13 جون2025ء) اسلام آباد چیمبر آف کامرس اینڈ انڈسٹری کے صدر ناصر منصور قریشی نے وفاقی بجٹ 2025-26 پر کڑی تنقید کرتے ہوئے اسے صنعت مخالف اور آئی پی پیز دوست قرار دیا ہے۔ مختلف انٹرویوز میں انہوں نے سولر پینل کی درآمدات پر 18 فیصد سیلز ٹیکس کے نفاذ پر گہری تشویش کا اظہار کرتے ہوئے اسے صنعت اور صاف توانائی کو اپنانے کی قیمت پر آئی پی پیز کو فائدہ پہنچانے کے لیے ایک دانستہ قدم قرار دیا ہے۔

انہوں نے نشاندہی کی کہ ملک میں اس وقت اضافی بجلی موجود ہے جو صنعتوں کو رعایتی نرخوں پر فراہم کی جا سکتی تھی۔ انہوں نیکہاکہ"ہمارے بیمار صنعتی شعبے کو بحال کرنا حکومت کی اولین ترجیح ہونی چاہیے تھی۔ سستی بجلی پیداواری لاگت کو کم کر سکتی تھی، مسابقت کو بڑھا سکتی تھی، اور معاشی سرگرمیاں بحال کر سکتی تھی"۔

(جاری ہے)

وزیر خزانہ کے نقطہ نظر کے بارے میں ایک سوال پر، آئی سی سی آئی کے صدر نے افسوس کا اظہار کیا کہ حکومت سہولت کاری کے بجائے نفاذ اور زبردستی کے اقدامات پر زیادہ توجہ مرکوز کرتی نظر آتی ہے۔

"حکومتوں کا اولین مقصد لوگوں کی فلاح و بہبود اور راحت کے لیے کام کرنا ہوتا ہے۔ ڈرانے دھمکانے، ہراساں کرنے اور گرفتاری کی مہموں نے تاریخی طور پر بیک فائر کیا ہے اور ھمیشہ سرمائے کی پرواز کا باعث بنے ہیں ۔ انہوں نے خبردار کیا کہ ایک سرمایہ کار، ایک ہجرت کرنے والے پرندے کی طرح، صرف ایک ایسے ماحول میں بستا ہے جو معاون اور خوش آئند ہو،".آئی سی سی آئی کے صدر نے زور دیا کہ صنعتی شعبے کا فروغ پائیدار اقتصادی ترقی کی کلید ہے۔

انہوں نے مزید کہا کہ جب صنعت پروان چڑھتی ہے تو یہ نہ صرف روزگار پیدا کرتی ہے بلکہ برآمدی سامان کی پیداوار کو بھی فروغ دیتی ہے جس کے نتیجے میں زرمبادلہ کے ذخائر مضبوط ہوتے ہیں۔انہوں نے پٹرولیم مصنوعات پر مجوزہ کاربن لیوی کو مزید تنقید کا نشانہ بناتے ہوئے خبردار کیا کہ اس سے لامحالہ مہنگائی بڑھے گی اور عام آدمی پر بوجھ بڑھے گا۔ انہوں نے نتیجہ اخذ کیا کہ "معاشی عدم استحکام کے وقت اس طرح کے اقدامات عوامی پریشانی کو مزید بڑھوا دیں گے۔لہذاآئی سی سی آئی حکومت پر زور دیتا ہے کہ وہ اپنی مالیاتی پالیسیوں پر نظرثانی کرے اور اقتصادی استحکام، سرمایہ کاری میں اضافے اور ملازمتوں کی تخلیق کو یقینی بنانے کے لیے صنعت دوست انداز اپنائے۔