Live Updates

چین کے ہینان صوبے میں سمندری طوفان سے خطرہ ، ہزار وں افراد محفوظ مقامات پر منتقل

جمعہ 13 جون 2025 13:21

بیجنگ (اُردو پوائنٹ اخبارتازہ ترین - اے پی پی۔ 13 جون2025ء) چین کے جنوبی صوبے ہینان میں سال کے پہلے طوفان ووٹپ سے خطرہ کے باعث ہزاروں افراد کو محفوظ مقامات پر منتقل کردیا گیا۔ چینی خبررساں ادارے شنہوا کے مطابق جمعرات کی رات 8 بجے تک تعمیراتی مقامات،نشیبی سیلاب زدہ علاقوں اور ممکنہ طور پر سیلاب کی زد میں آنے والے علاقوں سے 16561 افراد کو نکالا جاچکا تھا،صوبے کے تمام 30721 ماہی گیری کے جہاز یاتو بندرگاہوں پر واپس آچکے یا کسی اور جگہ پناہ لے چکے ہیں،اس کے علاوہ بحری جہازوں پر کام کرنے والے 40 ہزار سے زیادہ افراد کو بھی ساحل سے نکال لیا گیا ہے۔

صوبائی موسمیاتی سروس نے جمعے کی صبح 11 بجے تک درجہ III ٹائفون الرٹ برقرار رکھا۔ صبح 10 بجے تک طوفان کا مرکز لیڈونگ لی خود مختار کاؤنٹی کے قریب ساحلی پانیوں پر واقع تھا ، سمندری طوفان کے مرکز ہواؤں کی رفتار 28 میٹر فی سیکنڈ تک تھی۔

(جاری ہے)

رات 8 بجے تک صوبے کے کئی علاقوں میں موسلادھار بارش کا امکان ہے۔محکمہ موسمیات کی پیشن گوئی کے مطابق دوپہر کے وقت ٹائفون ووٹپ کے 5 سے 10 کلومیٹر فی گھنٹہ کی رفتار سے شمال کی طرف بڑھنے کی توقع ہے ۔ووٹپ آج (جمعہ کو )ایک شدید استوائی طوفان کے طور پر لیڈونگ کاؤنٹی اور ڈونگ فانگ سٹی کے درمیان ساحل سے ٹکرا سکتا ہے اور 25 سے 28 میٹر فی سیکنڈ کی رفتار سے ہوائیں چل سکتی ہیں۔