سیالکوٹ، چاول اور سبزیوں پر زرعی زہروں کی باقیات کی تخفیف کے موضوع پر میگا کسان سیمینار،محکمہ زراعت کے افسران و دیگر سٹیک ہولڈرز نے شرکت کی

جمعہ 13 جون 2025 13:30

سیالکوٹ (اُردو پوائنٹ اخبارتازہ ترین - اے پی پی۔ 13 جون2025ء) محکمہ زراعت (پلانٹ پروٹیکشن)پیسٹ وارننگ و کوالٹی کنٹرول آف پیسٹی سائیڈز ضلع سیالکوٹ کے زیر اہتمام شریف میرج ہال بجوات میں "منصوبہ برائے چاول اور سبزیوں پر زرعی زہروں کی باقیات کی تخفیف" کے موضوع پر ایک میگا کسان سیمینار کا اہتمام کیا گیا جس میں ڈاکٹر مقصود احمد ڈائریکٹر زراعت (پلانٹ پروٹیکشن) سیالکوٹ،تلفورالحسن ڈائریکٹر زراعت (پلانٹ پروٹیکشن) گوجرانوالا ڈویژن، نمائندہ رائس ایکسپورٹ ایسوسی ایشن آف پاکستان عبدالرحمٰن ، سینئر سائنسدان کالا شاہ کاکو صدیق شاکر ، رانا سلیم شاد اسسٹنٹ ڈائریکٹر زراعت (توسیع) سیالکوٹ، پیسی سائیڈز و کھاد ڈیلرز ،کسانوں اور سٹیک ہولڈرز کی بڑی تعداد نے شرکت کی۔

ماہرین کی طرف سے کسانوں کو چاول کی منظور شدہ اقسام، زہروں کی باقیات سے پاک پیداوار کے حصول بلخصوص چاول کی فصل پر ممنوعہ زہروں، دھان کی فصل کے نقصان دہ کیڑے، بیماریاں، ان کی پہچان اور تدارک، دھان ایکسپورٹ کے مسائل، زہروں کی باقیات اور سدباب پر تفصیلی لیکچرز دیے گئے۔

(جاری ہے)

چاول اور سبزیوں پر کیڑے مار ادویات کی باقیات کو کم کرنے، پی ایچ آئی اور دیگر مروجہ مسائل کے بارے میں تفصیل سے آگاہ کیا گیا۔

کاشتکار وں کو زہروں سے پاک محفوظ دھان کی پیداوار لینے کے متعلق شعور کو اجاگر کیا۔ ڈاکٹر مقصود احمد اور تلفورالحسن نے ڈائریکٹر جنرل پیسٹ وارننگ ڈاکٹرعامر رسول صاحب کے ویژن مربوط طریقہ انسداد کو اپناتے ہوئے "مناسب اور موزوں زہروں کا مناسب وقت پر انتخاب اوراستعمال" اور وقفہ قبل از برداشت (پی ایچ آئی) کو ہرصورت مد نظر رکھنے کے ساتھ ساتھ زہروں کے استعمال کو ہمیشہ آخری آپشن رکھنے پر زور دیا۔