ساہیوال آرٹس کونسل کے زیر اہتمام ''عید سنگیت میلہ'' کے عنوان سے ایک رنگارنگ پروگرام ہوا

جمعہ 13 جون 2025 13:50

ساہیوال (اُردو پوائنٹ اخبارتازہ ترین - اے پی پی۔ 13 جون2025ء) ساہیوال آرٹس کونسل کے زیر اہتمام ''عید سنگیت میلہ'' کے عنوان سے ایک رنگارنگ پروگرام ہوا جس میں معروف گلوکاروں نے اپنی آواز کا جادو جگا کر شرکاء کو خوب محظوظ کیا۔پروگرام کے مہمانِ خصوصی ایڈیشنل کمشنر کوآرڈینیشن ڈاکٹر سیف اللہ بھٹی تھے۔ اپنے خطاب میں انہوں نے کہا کہ حکومت پنجاب عوام کو صحت مند اور مثبت تفریحی سرگرمیاں فراہم کرنے کے لیے سنجیدہ اور فعال ہے۔

ایسی تقریبات نہ صرف خوشی اور سکون کا باعث بنتی ہیں بلکہ معاشرے میں ثقافتی ہم آہنگی اور پاکستان کے سافٹ امیج کو فروغ دینے میں بھی مددگار ثابت ہوتی ہیں۔سنگیت میلہ کی میزبانی معروف کمپیئر الطاف سومرو نے کی جبکہ پروگرام میں شرکت کرنے والے نمایاں گلوکاروں میں رمضان جانی، احمد علی لونے والا، پراچہ سسٹرز اور عصمت نواز شامل تھے۔

(جاری ہے)

نوجوان گلوکار رمضان جانی کی پرفارمنس کو حاضرین نے بے حد سراہا جنہوں نے پنجاب کے کلاسیکل شعرا کے کلام کو جدید انداز میں پیش کیا اور دل جیت لیے۔

پروگرام کی خاص بات یہ تھی کہ معروف شاعر مجید امجد کو خراجِ عقیدت پیش کرتے ہوئے ان کے دل پذیر کلام ''او طنبور بجاتے راہی'' کو مقامی گلوکار فدا حسین کی آواز میں کمپوز کیا گیا جس کی باقاعدہ لانچنگ بھی اسی تقریب میں ہوئی۔ حاضرین نے آرٹس کونسل کی اس جاندار اور معیاری پروڈکشن کو بے حد پسند کیا اور ڈائریکٹر ڈاکٹر ریاض ہمدانی کی کاوشوں کو سراہا۔تقریب میں ڈائریکٹر انفارمیشن محمد عقیل اشفاق، اسسٹنٹ ڈائریکٹر ساہیوال آرٹس کونسل الیاس اکبر سگلہ سمیت مختلف شعبہ ہائے زندگی سے تعلق رکھنے والی معزز شخصیات اور ان کی فیملیز نے شرکت کی۔\378