لیسکومیں خواتین ملازمین کیلئے بیہیویئر بیسڈ سیفٹی آگاہی سیشن کا انعقاد

لاہور (اُردو پوائنٹ اخبارتازہ ترین - اے پی پی۔ 13 جون2025ء) چیف ایگزیکٹو لیسکو انجینئر محمد رمضان بٹ کی خصوصی کاوش اور ایشیائی ترقیاتی بینک کے تعاون سے لاہور الیکٹرک سپلائی کمپنی میں بیہیویئر بیسڈ سیفٹی آگاہی سیشن کا انعقاد کیا گیا، جس کا مقصد لیسکو میں فرائض سرانجام دینے والی خواتین کوکام کی جگہ پر موجود خطرات کی شناخت اور حادثات سے بچا وسے متعلق بین الاقوامی معیار کے مطابق تربیت فراہم کرنا تھا۔

چیف ایگزیکٹو لیسکو نے کہا کہ لاہور الیکٹرک سپلائی کمپنی اپنے ملازمین کی حفاظت کے لیے ہر ممکن اقدامات کر رہی ہے، لیسکو پاکستان کی پہلی ڈسٹری بیوشن کمپنی ہے جہاں ملازمین کو عالمی معیار کی سیفٹی ٹریننگ فراہم کی جاتی ہے، آج کا تربیتی سیشن بھی ہمارے عزم کی عکاسی کرتا ہے۔

(جاری ہے)

تربیتی سیشن میں لیسکو کے مختلف دفاتر سے تعلق رکھنے والی ڈپٹی منیجرز، اسسٹنٹ منیجرز اور کمرشل اسسٹنٹس نے بھرپور شرکت کی۔

سیشن کی صدارت ایشیائی ترقیاتی بینک کی جانب سے مقرر کردہ معروف ماہرِ آکیوپیشنل ہیلتھ اینڈ سیفٹی افشاں سعید نے کی۔ اس موقع پر انہوں نے بیہیویئر بیسڈ سیفٹی کے اصولوں، عملی مثالوں، اور روزمرہ کام میں حفاظتی رویوں کو اپنانے کی اہمیت پر جامع بریفنگ دیتے ہوئے کہا کہ سیفٹی کا تصور صرف جسمانی تحفظ تک محدود نہیں بلکہ اس میں ملازم کی جسمانی، ذہنی، جذباتی اور روحانی صحت بھی شامل ہے۔

آپ جوطرز عمل اختیار کرتے ہیں، وہ نہ صرف آپ کی ذاتی فلاح کا ضامن ہوتا ہے بلکہ ادارے کی مجموعی کارکردگی اور فلاح پر بھی اثر انداز ہوتا ہے۔ تربیتی سیشن کے دوران ذہنی دباکو پہچاننے اور قابو پانے کی تکنیک، موثر ابلاغ، رویے میں مثبت تبدیلی، اخلاقیات اور پیشہ ورانہ طرز عمل سے متعلق بھی گفتگو کی گئی۔ خیال رہے کہ یہ تربیتی سیشن لیسکو کی اس مستقل کوشش کا حصہ ہے جس کا مقصد نہ صرف حفاظتی معیارکو بہتر بنانا اور ملازمین کی مجموعی فلاح کو فروغ دیناہے۔

تقریب کے اختتام پر تمام شرکا کو سرٹیفیکیٹس دیئے گئے۔ ڈی جی ایڈمن معصومہ عادل کا کہنا ہے کہ لیسکو جیسے ادارے کے لیے کام کرنا باعث فخر ہے کیونکہ اس ادارے میں خواتین کی فلاح کے لیے جو اقدامات کیے جاتے ہیں ان کی مثال اور کہیں نہیں ملتی۔انہوں نے امید ظاہر کی کہ مستقبل میں بھی اس طرح کے سیشنز کا انعقاد کیا جائے گا۔