غیراعلانیہ لوڈشیڈنگ، شہریوں کا فیروز پور روڈ بلاک کرکے شدید احتجاج

جمعہ 13 جون 2025 22:02

لاہور (اُردو پوائنٹ اخبارتازہ ترین - آن لائن۔ 13 جون2025ء) شہر کے مختلف علاقوں میں غیر اعلانیہ لوڈشیڈنگ کے خلاف شہری سراپا احتجاج بن گئے۔ پانچ گھنٹوں سے بجلی کی بندش پر مشتعل شہریوں نے مین فیروز پور روڈ کو بلاک کر دیا، جبکہ ماڈل ٹاؤن کورٹ کے سامنے واقع پٴْل بھی ٹریفک کے لیے بند کر دیا گیا۔

(جاری ہے)

ٹاؤن شپ ڈویڑن کے علاقوں بہار کالونی، کوٹ لکھپت، ماڈل ٹاؤن آر بلاک، ایس بلاک، لیاقت آباد بازار، دلکشاہ کالونی اور عمر کالونی میں پانچ گھنٹے سے بجلی معطل رہی، جس کے باعث شدید گرمی میں شہریوں کو سخت پریشانی کا سامنا کرنا پڑا۔

احتجاج کے دوران شہریوں کا کہنا تھا کہ لیسکو کی جانب سے بجلی کی بندش کی کوئی پیشگی اطلاع دی گئی نہ ہی پانچ گھنٹوں کے دوران کوئی تسلی بخش جواب فراہم کیا گیا۔بہار کالونی سب ڈویڑن کا عملہ دفتر چھوڑ کر غائب ہو گیا، جس پر شہری مزید مشتعل ہو گئے۔ احتجاج کے باعث ماڈل ٹاؤن کورٹ کے سامنے پٴْل پر گاڑیوں کی طویل قطاریں لگ گئیں۔بالآخر لیسکو عملہ موقع پر پہنچا اور بجلی کی جلد بحالی کی یقین دہانی کروائی، جس پر مظاہرین نے احتجاج ختم کرتے ہوئے روڈ ٹریفک کے لیے کھول دیا۔