بجٹ میں معاشی استحکام، محصولات جمع کرنےاور آئی ایم ایف کے پروگرام کی تعمیل پر بھرپور توجہ دی گئی ہے، وزیر خزانہ محمد اورنگزیب

ہفتہ 14 جون 2025 00:40

اسلام آباد (اُردو پوائنٹ اخبارتازہ ترین - اے پی پی۔ 14 جون2025ء) وزیر خزانہ محمد اورنگزیب نے کہا ہے کہ مالی سال 2025-26 کے وفاقی بجٹ میں معاشی استحکام، محصولات جمع کرنےاور بین الاقوامی مالیاتی فنڈ (آئی ایم ایف) کے پروگرام کی تعمیل پر بھرپور توجہ دی گئی ہے۔جمعہ کو ایک نجی نیوز چینل سے گفتگو کرتے ہوئے انہوں نے کہا کہ حکومت گزشتہ سال کے دوران حاصل ہونے والی پیشرفت پر کام کر رہی ہے، جامع ترقی کو فروغ دیتے ہوئے میکرو اکنامک اصلاحات کو جاری رکھنا ہے۔

انہوں نے کہا کہ پاکستان معاشی بحالی کے مرحلے میں داخل ہو چکا ہے اور مئی 2023 میں افراط زر کی شرح 28.5 فیصد سے کم ہو کر مئی 2024 میں تقریباً 11.8 فیصد رہ گئی ہے۔انہوں نے کہا کہ پالیسی کی شرح اب کم ہونا شروع ہو گئی ہے اور سالوں میں پہلی بار ہم نے کرنٹ اکاؤنٹ سرپلس اور بنیادی مالی سرپلس دونوں کو ریکارڈ کیا ہے ۔

(جاری ہے)

وزیر خزانہ نے کہا کہ حکومت نے محصولات کو بہتر بنانے کے لیے تین جہتی حکمت عملی اپنائی ہے جو کہ نفاذ، انتظامی اقدامات اور نئی ٹیکسیشن ہے۔

انہوں نے زور دیا کہ نئے ٹیکسوں کا ایک بڑا حصہ بہتر تعمیل اور دستاویزات کے ذریعے جمع کیا جائے گا۔انہوں نے کہا کہ ہم ٹیکس کی بنیاد کو وسیع کرنے کے لیے پرعزم ہیں۔ انہوں نے مزید کہا کہ چینی، سیمنٹ، کھاد اور تمباکو جیسے اہم شعبوں میں ڈیجیٹلائزیشن اور ٹریک اینڈ ٹریس سسٹم کو وسعت دی جائے گی۔انہوں نے کہا کہ حکومت کی "تاجر دوست" اسکیم جس کا مقصد خوردہ اشیا فروخت کرنے والوں کو رجسٹر کرنا ہے، معیشت کو باضابطہ بنانے کی جانب ایک بڑا قدم ہے ۔

انہوں نے کہا کہ ٹیکنالوجی کا استعمال اور ریئل ٹائم رپورٹنگ ٹیکس چوری کو روکنے میں کلیدی کردار ادا کرے گی۔انہوں نے تنخواہ دار افراد پر بوجھ کو بھی تسلیم کیا اور یقین دلایا کہ ریلیف کے اقدامات متعارف کرائے گئے ہیں۔انہوں نے کہا کہ ہم نے ٹیکس سلیب تیار کرتے وقت تنخواہ دار طبقے کو ذہن میں رکھا ہے۔ ساتھ ہی، ہم اس بات کو یقینی بنا رہے ہیں کہ بغیر ٹیکس والے شعبے اپنا حصہ ڈالنا شروع کر دیں۔