ڈپٹی کمشنرکیپٹن (ر) ندیم ناصر کی زیر صدارت اقبال سٹیڈیم مینجمنٹ کمیٹی کا اجلاس

اتوار 15 جون 2025 16:20

فیصل آباد (اُردو پوائنٹ اخبارتازہ ترین - اے پی پی۔ 15 جون2025ء) ڈپٹی کمشنرکیپٹن (ر) ندیم ناصر کی زیر صدارت اقبال سٹیڈیم مینجمنٹ کمیٹی کا اجلاس منعقد ہوا جس میں سٹیڈیم کی تعمیر و ترقی، دکانوں کی نیلامی، فلاحی اقدامات اور انٹرنیشنل کرکٹ کی بحالی سے متعلق اہم فیصلے کیے گئے۔اتوار کو منعقدہ اجلاس میں ایڈیشنل ڈپٹی کمشنر (جنرل)طیب سیمع،ایڈیشنل ڈپٹی کمشنر(فنانس اینڈ پلاننگ)فضل عباس،کیئرٹیکر نوید نذیر کے علاوہ متعلقہ محکموں کے افسران نے شرکت کی۔

اجلاس کے دوران اقبال اسٹیڈیم میں قائم دکانوں کی باقاعدہ نیلامی کے عمل کو شفاف طریقے سے جلد مکمل کرنے کی ہدایت کی گئی۔ ڈپٹی کمشنر نے کہا کہ نیلامی سے حاصل شدہ آمدن اسٹیڈیم کی بہتری اور عوامی سہولیات کی فراہمی پر خرچ کی جائے گی۔

(جاری ہے)

اجلاس میں مرحوم ملازم کی بیٹی کے وظیفہ میں مزید اضافہ کرکے میٹرک تک تعلیمی اخراجات ضلعی انتظامیہ کی جانب سے اٹھانے کی منظوری بھی دی گئی۔

ڈپٹی کمشنر نے کہا کہ ضلعی حکومت اپنے ملازمین اور ان کے اہل خانہ کی فلاح و بہبود کو اولین ترجیح دیتی ہے۔اجلاس کے دوران اقبال اسٹیڈیم کو انٹرنیشنل کرکٹ کے معیار کے مطابق بہتر بنانے کے لیے بھی جامع حکمت عملی پر غور کیا گیا۔ ڈپٹی کمشنر نے اسٹیڈیم کے انفراسٹرکچر کی بہتری، سیکیورٹی انتظامات، صفائی، پویلین، نشستوں، لائٹس، ڈریسنگ رومز اور دیگر سہولیات کو بین الاقوامی معیار کے مطابق بنانے کی ہدایت جاری کی۔

ڈپٹی کمشنر نے مزید کہا کہ فیصل آباد کرکٹ کے حوالے سے ایک اہم شہر ہے اور یہاں انٹرنیشنل کرکٹ کی بحالی کیلئے تمام ممکنہ اقدامات کیے جائیں گے۔ انہوں نے کہا کہ اقبال اسٹیڈیم صرف کھیل کا میدان نہیں بلکہ نوجوانوں کی مثبت سرگرمیوں کا مرکز ہے جسے جدید سہولیات سے آراستہ کرنا وقت کی اہم ضرورت ہے۔ انہوں نے کہا کہ عوامی تفریح اور کھلاڑیوں کو سہولیات فراہم کرنا ضلعی انتظامیہ کی اولین ترجیح ہے۔