اسلام آباد پولیس کی جانب سے مسیحی عبادت گاہوں کے تحفظ کیلئے فول پروف سیکیورٹی انتظامات کئے گئے

اتوار 15 جون 2025 17:45

اسلام آباد (اُردو پوائنٹ اخبارتازہ ترین - این این آئی۔ 15 جون2025ء)اسلام آباد پولیس کی جانب سے مسیحی عبادت گاہوں کے تحفظ کیلئے فول پروف سیکیورٹی انتظامات کئے گئے۔

(جاری ہے)

تفصیلات مطابق انسپکٹر جنرل آف پولیس اسلام آباد سیدعلی ناصررضوی کے خصوصی احکامات کی روشنی میں اسلام آباد پولیس نے اتوار کے روز وفاقی دارالحکومت میں واقع چرچز کی سیکیورٹی کے لیے بھرپور اقدامات کئے اورعبادات میں مصروف مسیحی برادری کو مکمل تحفظ فراہم کیا، مختلف چرچز کے باہر پولیس افسران اور جوان الرٹ ڈیوٹی پر مامور رہے،ایس ایس پی آپریشنز اسلام آباد محمد شعیب خان نے کہا کہ تمام متعلقہ تھانوں کو خصوصی ہدایات جاری کی گئی تھیں کہ وہ اپنے علاقوں میں قائم عبادت گاہوں کی سکیورٹی کا ازسرِنو جائزہ لیں اور فول پروف انتظامات کو یقینی بنائیں، اسی طرح داخلی اور خارجی راستوں پر چیکنگ سخت کی گئی، جبکہ واک تھرو گیٹس اور سی سی ٹی وی کیمروں کے ذریعے نگرانی عمل میں لائی گئی،جبکہ سینئر افسران نے مختلف چرچز کا دورہ کر کے سکیورٹی انتظامات کا جائزہ لیا اور موقع پر موجود اہلکاروں کو ضروری ہدایات جاری کیں،اس موقع پر خواتین پولیس اہلکار بھی سکیورٹی ٹیموں کا حصہ رہیں تاکہ فیملیز کو پرسکون ماحول مہیا کیا جاسکے،ایس ایس پی آپریشنز نے کہا کہ تمام اقلیتوں کے جان و مال کا تحفظ ہماری اولین ترجیح ہے،ہم کسی بھی قسم کے ناخوشگوار واقعے سے نمٹنے کے لیے ہمہ وقت تیار ہیں،اسلام آباد پولیس شہریوں سے بھی اپیل کرتی ہے کہ وہ کسی بھی مشکوک سرگرمی کی اطلاع فوری طور پر قریبی تھانے یا ہیلپ لائن پکار15 پر دیں، تاکہ بروقت کارروائی ممکن بنائی جا سکے۔