ایف بی آر افسران پر مراعات کی بارش

ایف بی آر کو خصوصی فیچرز والی 1 ہزار گاڑیوں کی فراہمی کاعمل شروع ہو گیا

محمد علی پیر 16 جون 2025 19:37

لاہور (اُردو پوائنٹ اخبارتازہ ترین۔ 16 جون2025ء) ایف بی آر افسران پر مراعات کی بارش، ایف بی آر کو خصوصی فیچرز والی 1 ہزار گاڑیوں کی فراہمی کاعمل شروع ہو گیا۔ تفصیلات کے مطابق ایف بی آر نے ٹیکس کے پیسے سے ایک ہزار گاڑیاں منگوانا شروع کر دیں۔ باوثوق ذرائع کے مطابق ایف بی آر نے افسران کیلئے 12 سو سی سی کی ایک ہزار سے زائد گاڑیوں کی دو بڑی کمپنیوں سے خریداری کی۔

ذرائع نے بتایا کہ چیئرمین ایف بی آر گریڈ 18 تک کے افسران کو یہ گاڑیاں دی جائیں گی، چیئرمین ایف بی آر راشد لنگڑیال ایف بی آر نے کار مینوفیکچررز سے ایک ہزار 10 گاڑیاں سپیشل فیچرز کیساتھ بُک کرائیں۔ تمام گاڑیوں کی دونوں سائیڈ پر ایف بی آر کا سٹیکر بھی لگوایا گیا ہے۔ واضح رہے کہ رواں سال کے آغاز میں ایف بی آر افسران کیلئے 1 ہزار گاڑیاں خریدنے کا فیصلہ کیا گیا تھا۔

(جاری ہے)

بتایا گیا کہ ایف بی آر نے 6 ارب روپے کی لاگت سے 1 ہزار گاڑیاں خریدنے کا فیصلہ کیا۔ ایف بی آر ذرائع کی جانب سے بتایا گیا کہ نئی گاڑیوں کی خریداری 2 مراحل میں ہو گی جس کے لیے ایف بی آر مکمل رقم ادا کرے گا، 1010 گاڑیوں کی خریداری کے لیے 3 ارب کی پیشگی ادائیگی کی جائے گی، 3 ارب روپے 500 گاڑیوں کی مکمل ادائیگی کے طور پر تصور کیے جائیں گے۔ 500 گاڑیوں کی پہلی کھیپ کی ترسیل کے بعد بقیہ ادائیگی کی جائے گی، 1010 گاڑیوں کی ڈلیوری جنوری سے مئی 2025 کے دوران کی جائے گی، پہلے مرحلے میں جنوری میں 75، فروری میں 200 گاڑیاں ڈلیور کی جائیں گی جبکہ مارچ میں 225 گاڑیوں کی ڈلیوری کی جائے گی۔

دوسرے مرحلے میں اپریل میں 250 اور مارچ میں 260 گاڑیاں ڈلیور کی جائیں گی۔ ترجمان ایف بی آر کا اس حوالے سے کہنا تھا کہ گاڑیوں کی خریداری ایف بی آر کے ٹرانسفارمیشن پلان کا حصہ ہے، یہ گاڑیاں فیلڈ افسران کی استعداد کار بہتر بنانے کیلئے لی جا رہی ہیں، یہ گاڑیاں صرف فیلڈ افسران کے لیے ہوں گی۔