Live Updates

اسرائیل پاکستان کو میلی آنکھ اٹھا کر دیکھنے کی ہمت بھی نہیں کرسکتا

اسرائیلی وزیراعظم کا پرانا بیان چلایا جارہا ہے، وزیردفاع خواجہ آصف کا بھی فیک کلپ چلایا گیا، فیک نیوز کی بھرمار ہے احتیاط برتنی چاہیے، جنگ کوئی بچوں کا کھیل نہیں، وزیرخارجہ اسحاق ڈار کا سینیٹ میں اظہارخیال

ثنااللہ ناگرہ پیر 16 جون 2025 20:55

اسرائیل پاکستان کو میلی آنکھ اٹھا کر دیکھنے کی ہمت بھی نہیں کرسکتا

اسلام آباد (اُردو پوائنٹ اخبارتازہ ترین۔ 16 جون2025ء) نائب وزیراعظم، وزیرخارجہ سینیٹراسحاق ڈار نے کہا ہے کہ اسرائیل پاکستان کو میلی آنکھ اٹھا کر دیکھنے کی ہمت بھی نہیں کرسکتا، اسرائیلی وزیراعظم کا پرانا بیان چلایا جارہا ہے، وزیردفاع خواجہ آصف کا بھی فیک کلپ چلایا گیا۔ ہم نیوز کے مطابق سینیٹ میں اظہار خیال کرتے ہوئے وزیرخارجہ اسحاق ڈار نے کہا کہ جب پاکستان کی حفاظت کی بات ہوگی تو ہم سب ایک ہیں، اسرائیل میں ہمت بھی نہیں کہ پاکستان کی طرف میلی آنکھ اٹھا کر بھی دیکھ سکے۔

فیک نیوز کی بھرمار ہے احتیاط برتنی چاہیے، اسرائیلی وزیراعظم کا پرانا بیان چلایا جارہا ہے، وزیردفاع خواجہ آصف کا بھی فیک کلپ چلایا گیا۔ خطے کی صورتحال پر پوری نظر ہے اور پاکستان کی مسلح افواج مکمل طور پر الرٹ ہے۔

(جاری ہے)

پاکستان نے اسرائیل سے بھی بڑے دشمن کا مقابلہ کیا ہے، اگرپاکستان پر کسی قسم کا کوئی حملہ ہوا تو اینٹ کا جواب پتھر سے دیا جائے گا۔

امریکا اور ایران کے درمیان مذاکرات کی کامیابی کیلئے ہماری پوری کوشش تھی، ایران اور عمان کے وزرائے خارجہ نے مجھے لوپ میں رکھا، ہم معاملات کو مذاکرات کے ذریعے حل کرنے پر یقین رکھتے ہیں۔ 15جون کو ایران اورامریکا میں دوبارہ مذاکرات شیڈول تھے۔ مزید برآں نائب وزیراعظم اور وزیر خارجہ سینیٹر محمد اسحاق ڈار نے مصر کے وزیر خارجہ بدر عبدلطیٰ سے ٹیلیفون پر گفتگو کی۔

پیر کو ترجمان دفتر خارجہ کی جانب سے جاری بیان کے مطابق دونوں رہنمائوں نے ایران کے خلاف اسرائیل کی بلا جواز جارحیت کے تناظر میں بگڑتی ہوئی علاقائی صورتحال پر گہری تشویش کا اظہار کیا۔ انہوں نے خطے اور اس سے باہر امن و استحکام کو برقرار رکھنے کے لیے مل کر کام کرنے کے عزم کا اعادہ کیا۔ اسی طرح نائب وزیراعظم اور وزیر خارجہ سینیٹر محمد اسحاق ڈار سے جاپان میں پاکستان کے نامزد سفیر عبدالحمید بھٹہ نے پیر کو یہاں ملاقات کی۔

دفتر خارجہ کی جانب سے جاری بیان کے مطابق نائب وزیراعظم نے نامزد سفیر کو نئی ذمہ داری پر مبارکباد دیتے ہوئے ان کی کامیابی کے لئے نیک خواہشات کا اظہار کیا۔ انہوں نے پاکستان جاپان دوطرفہ تعلقات خاص طور پر تجارت، سرمایہ کاری، آئی ٹی اور صنعتی تعاون کے شعبوں میں تعاون کو مزید وسعت دینے کی اہمیت پر زور دیا۔