Live Updates

ریاستی ادارے اور حکومتیں عوام کو اپنی طاقت سے کمزور اور بے بس نہ بنائیں

عوام اپنا جائزآئینی حق مانگتے ہیں، ملک کو بحرانوں سے نکالنے کیلئے عوام کا جمہوریت اورانتخابات پر اعتماد بحال کرنا ہوگا، لاپتہ افراد کی بازیابی اور سیاسی قیدیوں کی رہائی عمل میں لانا ضروری ہے۔ نائب امیر جماعت اسلامی لیاقت بلوچ

ثنااللہ ناگرہ پیر 16 جون 2025 20:17

ریاستی ادارے اور حکومتیں عوام کو اپنی طاقت سے کمزور اور بے بس نہ بنائیں

لاہور ( اردوپوائنٹ اخبار تازہ ترین۔ آئی پی اے ۔ 16 جون 2025ء ) نائب امیر جماعت اسلامی، مجلسِ قائمہ سیاسی قومی امور کے صدر لیاقت بلوچ نے کہا ہے کہ حماس اور ایران نے اسرائیل کی بنیادیں ہلادی ہیں، ظلم، تکبر، غرور کا محل لرزہ براندام ہے. ایرانی جوابی میزائل حملوں نے صرف تین دنوں میں ہی اسرائیل کو گھٹنے ٹیکنے پر مجبور کردیا ہے، اسرائیل ثالثی کے لیے مغربی ممالک کی مدد مانگنے لگا.

ٹرمپ نے بھی پاک بھارت طرز پر ایران اسرائیل جنگ بندی معاہدے کا عندیہ دے دیا. عالمِ اسلام کے عسکری، اقتصادی اور اسٹریٹیجک اتحاد کے ذریعے امریکی سرپرستی سے مشرقِ وسطیٰ کو بارود اور آگ کی بھٹی میں جھونکے والے اسرائیل کا وجود مٹایا جاسکتا ہے. گاؤں کا چوہدری لڑائی جھگڑے شروع کراتا ہے لیکن جب اُس کی اپنی پگڑی گِرنے لگتی ہے تو وہ صلح صفائی پر اُتر آتا ہے، یہی حال اِس وقت دُنیا بھر میں چوہدری بن کر پھرنے والے امریکہ کا ہے.

امریکہ نے دُنیا بھر میں اپنی بالادستی کو قائم رکھنے اور دیگر ممالک کو اپنا زیرِنگیں رکھنے کے لیے جنگوں، اسلحہ کی خرید و فروخت کے ذریعے دہشت گردی، فتنہ و فساد کی آگ بھڑکائی، اب یہ آگ خود اُس کے وجود کے لیے خطرناک ہوگئی ہے. دُنیا میں جنگوں کا خاتمہ ہی امریکہ کو تباہی سے بچاسکتا ہے. جنگ بندی کی جو بھی اور جہاں بھی کوشش ہو وہ عالمی امن انسانوں کے لیے اچھا ہے.

لیکن پائیدار امن، عزت و وقار اور ظالم و ظلم کا مستقل بنیادوں پر راستہ روکنے کے لیے عالمِ اسلام کو عسکری، اقتصادی اور علم و ٹیکنالوجی کے میدانوں میں ترقی کے لیے باہم اتحاد کرنا ہوگا.

لیاقت بلوچ نے منصورہ میں سندھ، بلوچستان کے رہنماؤں سے گفتگو کرتے ہوئے کہا کہ بلوچستان کے حالات اور سندھ میں بدامنی، ڈاکو راج عوام کے لیے وبالِ جان بن گئے ہیں.

ریاستی ادارے اور آلہ کار حکومتیں عوام کو فتح کرکے ریاستی و حکومتی طاقت سے انہیں کمزور و بیبس نہ بنائیں. عوام اپنا جائز آئینی حق مانگتے ہیں، حکمران عوام کو 'تنگ آمد بجنگ آمد' کے راستے پر نہ ڈالیں. انڈیا کی طرف سے دوبارہ جارحیت کے امکانات بڑھ رہے ہیں، تاھم اِس بار کا مِس ایڈونچر مودی کو کافی سے زیادہ مہنگا پڑے گا۔

(جاری ہے)

اسرائیلی دہشت گردی اور جارحیت غزہ، لبنان، شام، یمن، عراق سے ہوتے ہوئے ایران تک پھیلادی گئی ہے، پاکستان کے لیے خطرات کے امکانات بڑھ گئے ہیں۔ اس صورتحال میں اندرونی استحکام، عامۃ الناس اور ریاستی اداروں کے درمیان ہم آہنگی قومی سلامتی کے لیے ناگزیر ہے۔ ملک کو بحرانوں سے نکالنے کے لیے عوام کا جمہوریت، انتخابات اور پارلیمانی نظام پر اعتماد بحال کرنا، شہری حقوق کے تحفظ کے لیے بااختیار بلدیاتی نظام اور انتخابات کا حق بحال کرنا، وسائل کی مُنصفانہ تقسیم اور صوبوں کا آئینی حقِ ملکیت تسلیم کرنا اور انسانوں پر مسلط غیر آئینی، غیر قانونی، انسانی حقوق کی پامالی پر مبنی نظام ختم کرکے لاپتہ افراد کی بازیابی اور سیاسی قیدیوں کی رہائی عمل میں لانا ضروری ہے۔ لیاقت بلوچ نے بلوچستان اور سندھ کے رہنماؤں کو یقین دِلایا کہ جماعتِ اسلامی ملک میں آئین، قانون اور آزاد عدلیہ کی فرمانروائی اور صوبوں کے حقوق کے تحفظ کے لیے آئینی قومی جدوجہد تیز کرے گی۔